Día de la infancia en Candás

L'Asociación Vecinal de La Matiella, en collaboración el Conceyu de Carreño, entama esti domingu, 11 d'agostu, como vien siendo habitual el Día de la Infancia.

La cita que va celebrase na área recreativa de “La Fuennte Los Ángeles” del barriu candasín, va tener llugar ente les 11:30 h y les  20:00 h., cuntando con  participación de neños y neñes de 6 a 12 años d'edá.

Delles van ser les entidaes que van participar cola Asociación Vecinal, pa faer d'esti día un día inolvidable, al empar que lúdicu y educativu, pa los y les más pequeñes de la casa. Ente elles hai que destacar la participación, una vegada más, de la Banda de Gaites Candás al traviés de la “Bandina” de escolinos y escolines que nun futuru cercanu van pasar a formar parte de la Banda como tal. Ellos y elles van ser los encargaos/es de poner el toque musical a la xornada. Ente que pal “Candás Rugby Club” va ser la primer vegada que van participar nesta xornada de confraternización con una exhibición del deporte que practiquen nel horariu vespertín” señaló David García-Conceyal de Mocedá.

Ente les novedaes d'esta edición, amás de cuntar cola exhibición del club candasín a les 11:30 h, tres la finalización d'ésta, va dar empiezu la sesión vermú amenizada pola “Bandina”. Pa ello l'asociación va habilitar una zona de la área recreativa onde a precios populares van sirvise pinchos caseros y bébores. Esta iniciativa yera una de les más demandaes poles families qu'añu tres d'añu alleguen a esta xornada. Porque les families non yá asisten a los xuegos y actividaes programaes sinón que faen d'esti día una xornada de confraternización de la vecindá del barriu na qu'aprovechando los servicios de la área pa comer, merendar, ..o a compartir un culín de sidra col vecín/a” prosiguió'l Conceyal.

Yá na tarde a partir de les 16:00 y hasta les 20:00 h va ser la vegada de los xuegos infantiles, de los castiellos enchibles, o de la globoflexia.  Xuegos estos que van faer les delicies de los neños y neñes qu'alleguen a la celebración del so “Día”. Les actividaes d'animación van ser impartíes por Baúl Abierto. Ludoteca Móvil”” remató García.

El programa previstu pa la celebración del Día de la Infancia” esti 11 d'agostu na Área Recreativa de “La Fuente Los Ángeles” va ser el siguiente:

·         A les 11:30 h Exhibición del Candás Rugby Club

·         De siguío Sesión  Vermú amenizada pola “Bandina” de la Banda de Gaites Candás

·         De 16:00 a 20:00 h Xuegos Infantiles:

-  De 16:00 a 17:00  h Talleres de globoflexia, maquillaxes risonderos, xuegos cooperativos col paracaíes
-  De 17:00 a 20:00 h Castiellos Enchibles
-  De 17:00 a 20:00 h Circuitu de Karts a pedales