Carreño contribúi a la reconocencia y la recuperación de les races autóctones asturianes

Manuel Noceda, edil de Mediu Rural, José Manuel Díaz Pravia, Pres. ACOXA,
Amelia Fernández, Alcaldesa y Germán Concheso, Presidente de 
ACPRA
El Conceyu de Carreño suscribió, na mañana güei, un conveniu coles asociaciones ensin ánimu d'arriquecimientu “Asociación de Criadores de la Oveya Xalda” y “Asociación de Criadores de Ponis de Raza Asturcón” pa la cesión d'unu de los locales allugáu na antigües  Escueles de Carrió, nel barriu d'El Bandín.

El Salón de Plenos de la Casa Consistorial acoyó l'actu de firma electrónica del conveniu y l'entrega de llaves de les instalaciones municipales. Un actu presidíu pola Alcaldesa de Carreño, Amelia Fernández López; la cual tuvo acompañada en representación de l'Asociación de Criadores de la Oveya Xalda” pol so presidente José Manuel Díaz Pravia; y por Germán Concheso González, Presidente de l'Asociación de Criadores de Ponis de Raza Asturcón”.

Nel procesu de recuperación de les races autóctones asturianes xugaron un papel determinante diverses persones y colectivos que con un enorme esfuerzu y gran ciñu esmolecieron por caltener hasta los nuesos díes esti patrimoniu de valor incalculable. Güei, son les Asociaciones de Criadores les que cola reconocencia oficial oportunu xestionen los llibros xenealóxicos d'estes races y les que les fomenten. Dende esta alministración local, na midida de les nueses posibilidaes, queremos contribuyir a calteneles. En Carreño hai 40 ponis de raza asturcón pertenecientes a 2 ganaderíes y 200 exemplares d'oveya xalda pertenecientes a 4 ganaderíes” - esplicó l'Alcaldesa.

Tamién les distintes alministraciones participen y collaboren coles asociaciones de criadores en distintos frentes: sofitando con ayudes, participando y promoviendo proyectos d'investigación y desenvolvimientu, roblando convenios y alcuerdos de collaboración, según en diverses actividaes pa la recuperación, caltenimientu, selección y promoción de les races autóctones asturianes.

En Carreño, dende va años en collaboración con ARPPA (Asociación pa la Recuperación de la Pita Pinta Asturiana) vienen realizándose diverses actividaes como esposiciones monográfiques y divulgatives na antigua fábrica de conserva Ortiz; xornaes de formación pa los socios y socies de l'asociación y captación de xueces; concursu infantil de cuentos, qu'anguaño va cumplir la so sesta edición, en llingua asturiana pa los neños y neñes que cursen los sos estudios en primaria y nel que la protagonista principal ye la Pita Pinta; el proyectu “Pon una Incubadora nel to Cole” al traviés del cual l'alumnáu del centru puede siguir tol procesu de la nacencia de los pitucos. Amás l'asociación nel so intentu de llegar a tol públicu editó xuntu col Conceyu de Carreño, y en collaboración cola Fundación ONCE, tien editáu un testu nel braille nel que vien recoyida tola información sobro esta raza autóctona asturiana. Más apocayá con ACOXA y ACPRA  nel muelle local realizáronse certames sobro diches races.

La cesión gratuita d'esti equipamientu municipal, hasta agora, en desusu, va ser compartíu poles dos entidaes ACOXA y ACPRA  pal desenvolvimientu de les acciones  y los fines propios de dambes asociaciones atendiendo a los sos oxetivos estatutarios. A partir de los próximos díes, esta dependencia va pasar a ser la see social de caúna de les entidaes.

Tamién, coles mires de poder celebrar  xuntes, sesiones formatives, asamblees o xuntes, previa solicitú nel Conceyu con una antelación mínima de 15 díes, diches entidaes van poder disponer del Salón Polivalente (antigua aula de la escuela) sito na planta baxa. Nun pudiendo faer usu del mesmu mientres los períodos electorales, mientres la celebración de funciones teatrales o de cualesquier otra actividá municipal programada pol Conceyu.

Non hai dulda que se riquen entá esfuerzos y collaboraciones pa siguir actuando y tratando de salvaguardar los nuesos recursos zoogenéticos autóctonos. Ente estes races, hai dalgunes que gocien d'una especial protección al tar catalogaes. L'Alministración Rexonal sigui dedicando una llínea específica d'ayudes. Estes ayudes amparen a les races que gocien yá de reconocencia oficial pol organismu competente, que ye Ministeriu d'Agricultura, Pesca y Alimentación.  Dende les respectives Asociaciones de Criadores, col sofitu de l'Alministración Rexonal, fueron dando los pasos conducentes a la recuperación y afitamientu d'unes races que siendo patrimoniu de toos podríen sumir de nun mediar esti tipu d'iniciatives sociales. Trátase concretamente de la raza bovina Asturiana del Monte, del Poni Asturcón, de la Cabra Bermeya, de la Oveya Xalda y de la Pita Pinta. Nel conceyu de Carreño viénose trabayando especialmente na recuperación de trés d'elles, pita pinta, oveya xalda y poni asturcón”  - señaló l'Alcaldesa de Carreño.

Los ponis de la raza Asturcón ye unu de los ponis más antiguos y puros del mundu. Pertenez al denomináu tronco celta, emparentáu con delles races del arcu atlánticu. Nel s. XX por cuenta de les repoblaciones masives de montes comunales, según el cruzamientu en busca d'animales de mayor tamañu, causaron una amenorga importante del censu de la raza, llegando, a finales de los 70, a tar nuna situación crítica. L'impulsu de la conciencia ecoloxista de los años 80, precedida poles iniciatives particulares y l'impulsu d'organizaciones emerxentes llogró frenar a tiempu la cayida del poni que llevaba camín ye una especie n'estinción.

Con esti oxetivu, el de criar l'asturcón en pureza fundióse en 1987 l'Asociación de Criadores de Ponis de Raza Asturcón” ACPRA la cual  xestiona'l Llibru Xenealóxicu de la raza, realiza'l marcáu de los potros y expede los documentos correspondientes. Procurando dar servicios de mancomún pa les persones acomuñaes y promociona, y participa, en collaboración con alministraciones y particulares, en tou tipu d'eventos que puedan sirvir de marcu pa dar a conocer la raza de Poni Asturcón.

El Poni Asturcón tien inscritos nel Llibru Xenealóxicu que xestiona l'Asociación de Criadores (ACPRA) un total de 2.600 animales de capa negra, correspondientes a 140 ganaderíes.

La Oveya Xalda, ye una oveya pequeña d'orixe celta, bien proporcionada, axiloses, viviegues y andarines. La so cabeza ye cóncava y tien una peculiar moña na frente. Les femes pueden algamar una media de 32 quilos y los machos lleguen hasta los 40 quilos. Presenten una llana de llargor variable dura polo dedicase pal texíu d'alfombra. Al igual qu'asocedió col poni Asturcón, el númberu de cabeces la oveya Xalda sufre un fuerte retrocesu a mediaos del s. XIX por cuenta de los plantíos nos montes comunales d'especies foranes. Asina nel añu 1982, n'Asturies, nun se llegaben al millar d'exemplares.

 Diez años dempués, en 1992 nació l'Asociación de Criadores d'Oveya Xalda”, ACOXA, unu de los  artífices del caltenimientu d'esta raza. Ye la responsable del Llibru Xenealóxicu de la especie, garantizando d'esta manera l'orixe de cada animal; realiza'l marcaje de los corderos nacíos nel añu, apurriendo les correspondientes certificaciones y entama y participa en toos aquellos eventos sobro esta raza autóctona.

La Oveya Xalda, pela so parte, supera los 5.000  efectivos, concretamente, tien censaos 4.800 femes y 215 carneros, en 140 ganaderíes.