Convocaes les ayudes económiques municipales pal pagu del IBI 2019

Per cuartu añu consecutivu, la Xunta de Gobiernu del Conceyu de Carreño, al traviés de la Conceyalía de Bienestar Social, aprobó la convocatoria d'ayudes económiques pal pagu del Impuestu sobre Bienes Inmuebles (IBI), relativos a persones y families del conceyu pal añu en cursu.

El IBI ye un impuestu encuadráu nel sistema tributariu local d'esixencia obligatoria pa los Conceyos, que grava'l valor de la titularidá que recai sobro bienes inmuebles de naturaleza tanto rústica como urbana 

Estes ayudes económiques, convocaes en concurrencia competitiva, tienen como oxetivu evitar que la carga fiscal amestada a un bien de primera necesidá, como ye la vivienda, agrave la situación económica de les families más vulnerables que moren nel nuesu conceyu, siendo una ventena de families  les que se beneficiaron d'estes ayudes económiques na última convocatoria” señaló María Rosa Nodal- Conceyala de Bienestar Social.

Van Poder solicitar estes ayudes toes aquelles persones que s'atopen empadronaes y sían residentes en Carreño. Asina mesmu tendrán d'axuntar una serie de requisitos ente ellos hai que destacar:

·          Tar empadronáu/a y morar na vivienda oxeto de la subvención na fecha de presentación de la solicitú.

·         La persona que la solicita tendrá de ser el propietariu del inmueble y l'obligáu al pagu del IBI.

·         Nun tendrá de ser titular d'otru bien inmueble urbanu en tol territoriu nacional. Queden escluyíos una plaza de garaxe y trasteru adscritu a la vivienda habitual.

·         El valor catastral  que figure nel recibu del IBI correspondiente al exerciciu 2019 nun va poder entepasar de 60.000€.

·         Acreditar unos ingresos familiares que nun superen el 125 % del Indicador Públicu de Rentes d'Efectos Múltiples (IPREM) d'alcuerdu a la fórmula pa la ponderación d'ingresos familiares qu'establez el principáu d'Asturies

Les solicitúes, debidamente rellenaes, podrán presentase de llunes a vienres nel horariu de 9:00 a 14:00 hores en:

    El Centru Municipal de Servicios Sociales allugáu na cai Nicanor Piñole, 1 de Candás.
    El Rexistru Xeneral  del Conceyu de Carreño na cai Santolaya, 1-3 de Candás.
    en cualesquier de los llugares previstos nel artículu 16.4 de la Llei 39/2015, de 1 d'ochobre, de Procedimientu Alministrativu Común de les Alministraciones Públiques.

Dende al otru día a la publicación d'esta convocatoria nel Boletín Oficial del Principáu d'Asturies (BOPA) y hasta el 20 de noviembre del @2019, inclusive.

Si la solicitú nun axunta los requisitos establecíos nes bases de la presente convocatoria, l'órganu competente va riquir a la persona comenenciuda por que la igüe nel plazu máximu improrrogable de 10 díes, indicándo-y que si nun lo fixera va tenése-y por arrenunciada de la so solicitú.

El períodu voluntariu de cobru del impuestu del IBI pal añu 2019 ye dende'l 20 de setiembre hasta'l 20 de noviembre del presente.

Estableciéronse dos tipos d'ayudes atendiendo a los ingresos añales de la unidá familiar:

1.       100% de la cuantía del recibu del IBI de naturaleza urbana del 2019 pa les unidaes familiares que los sos ingresos  nun superen el IPREM añal ponderáu vixente nel exerciciu del que se computen datos.

2.       50% de la cuantía del recibu del IBI de naturaleza urbana del 2019 pa les unidaes familiares que los sos ingresos nun superen en 125% del IPREM añal ponderáu vixente nel exerciciu del que se computen datos.

Nel Presupuestu municipal en vixencia esiste un creitu disponible d'un máximu de 15.000 € con cargu a la partida “Ayudes Sociales” pa dar cobertoria a la concesión d'estes ayudes.