ADICAP aprueba n'asamblea el financiamientu dúna nueva convocatoria d'ayudes europees

Nel salón de plenos del Conceyu de Carreño, esti vienres 21 de febreru, diose lluz verde a dos convocatories tresañales:

–Ayudes Leader 2020, pa los conceyos de Carreño, Gozón, y zones rurales de Corvera y Llanera por un importe total de 1.188.907,07 € hasta l'añu 2022.
–Ayudes del programa d'ayudes del Fondu Européu Marítimu y Pesqueru (FEMP) pa los conceyos de Carreño y Gozón, que va cuntar con una partida presupuestaria de 89.149,73 € hasta'l 2021.

L'Asamblea Xeneral de l'Asociación pal Desenvolvimientu Integráu del Centru d'Asturies Periurbano (ADICAP), axuntada en Candás, aprobó'l financiamientu propuestu pola Conseyería de Desenvolvimientu Rural, Agroganadería y Pesca pa la convocatoria tresañal d'ayudes Leader 2020 por un importe total de 1.188.907,07 € hasta l'añu 2022. D'esa cantidá disponible, 901.774,80 € van ser pa conceder ayudes a proyectos empresariales, 237.332,77 € pa proyectos d'entidaes locales y 49.799,50 € pa entidaes ensin ánimu d'arriquecimientu. Los proyectos van deber d'allugase nos conceyos de Carreño, Gozón y zona rural de Corvera y Llanera.

El cambéu de les bases reguladores del Leader publicada nel BOPA apocayá pola Conseyería de Desenvolvimientu Rural, Agroganadería y Pesca va dexar ente los cambeos más significativos simplificar la tramitación burocrática pa solicitar una ayuda, la medría de l'ayuda del ticket rural de 25.000 € a 35.000 €, la medría de l'ayuda hasta'l 80% pal establecimientu de sistemes agroforestales o la posibilidá de subvencionar primeres instalaciones de mayores de 40 años n'esplotaciones agrícoles y ganaderes hasta una ayuda máxima de 300.000 € dientro de la midida d'inversiones pa esplotaciones agrícoles que contempla'l programa Leader. Prevese que'l Principáu d'Asturies pueda publicar la convocatoria nel BOPA nel plazu d'un mes aprosimao.

Nes convocatories Leader 2016 a 2019 ADICAP subvencionó hasta'l momentu un total de 74 proyectos lo que supon un total de 2.242.751,61 € n'ayudes concedíes (1.802.617,21€ pa proyectos empresariales, 338.676,01 € pa Conceyos y 101.457,39 p'asociaciones).

Na Asamblea Xeneral tamién diose cuenta de la próxima convocatoria d'ayudes del programa d'ayudes del Fondu Européu Marítimu y Pesqueru (FEMP) pa los conceyos de Carreño y Gozón, que va cuntar con una partida presupuestaria de 89.149,73 € hasta'l 2021. D'esa cantidá 29.000 € son pa conceder ayudes a proyectos empresariales, 24.000 € pa entidaes locales y 36.149,73 € pa entidaes ensin ánimu d'arriquecimientu. Prevese, al igual que nel programa Leader, que la convocatoria se publique nel plazu d'un mes aprosimao.

Hasta'l momentu, ADICAP aprobó dende l'añu 2016 un total de 15 proyectos de diversificación pesquera lo que supon un total de 350.697,70 € n'ayudes concedíes (156.348,38 € pa proyectos empresariales, 128.888,99 € pa entidaes locales y 65.460,33 € pa entidaes ensin ánimu d'arriquecimientu).