L'Alcaldesa de Carreño axúntase telemáticamente col Director Xeneral d'Innovación, Investigación y Tresformamientu Dixital del Gobiernu rexonal pa tresllada-y los problemes de conectividá mientres el COVID-19 y faer un siguimientu de los planes d'esplegue impulsaos polos operadores en Carreño.
La rexidora treslladó-y al Director les dificultaes del vecinderu de la zona rural de Carreño a la de realizar los exames universitarios on line, según los problemes detectaos nuna zona de Perlora, ónde teniendo un familiar hospitalizáu, nun podíen conectase col personal sanitariu pa conocer la evolución del ingresáu.
“La deficiente conectividá de Carreño, na zona periurbana de la área central asturiana, queda más patente cuando en situaciones como nesta crisis sanitaria hai que cuntar con infraestructures que soporten el teletrabayu, la teleformación y los pagos on line” - avanzó Amelia Fernández.
El mercáu de les Telecomunicaciones ta reguláu en base al conceutu de competencia ente operadores. La Secretaría d'Estáu de Telecomunicaciones ya Infraestructures Dixitales sometió a consulta de toles partes comenenciudes (operadores, alministraciones públiques, Comisión Nacional de los Mercaos y la Competencia y otros axentes) la relación preliminar de zones blanques y grises NGA, ellaborada a partir de la información disponible de cobertoria de redes de banda ancha de nueva xeneración (redes NGA), pal exerciciu 2020 L'oxetivu de la consulta foi consolidar esta identificación preliminar pa llograr la relación definitiva de zones blanques NGA y de zones grises NGA, nes que, acordies con la normativa d'ayudes d'Estáu, ye posible conceder ayudes públiques a lo llargo de 2020 pa la realización de proyectos d'estensión de la cobertoria de redes NGA en diches zones. Como novedá nésti añu 2020 dende'l Ministeriu facilitóse una aplicación web, de forma que al traviés d'un visor cartográficu amuesa gráficamente les zones blanques y grises del territoriu.
“Esti consistoriu analizó la información que publicó'l Ministeriu y unviándose dende l'Alcaldía los correspondientes escritos y allegamientos tanto al Ministeriu concretamente al Subdireutor Xeneral d'Operadores de Telecomunicaciones ya Infraestructures Dixitales como al Principáu. Precisamente'l Director d'Innovación tenía previstu faer en Candás, el pasáu 19 de Marzu a les 18 h., una sesión informativa “Conectividá, fibra óptica y otres opciones de calidá” el pasáu 19 de Marzu nel Centru polivalente “La Baragaña”. A consecuencia del COVID-19 túvose que suspender, siendo'l nuesu interés retomala asina la situación sanitaria lo dexe” – esplicó l'Alcaldesa de Carreño.
“Si tres la crisis sanitaria pueden reactivase y les operadores executen a bon ritmu les actuaciones previstes en Carreño - que tán subvencionaes pol Ministeriu- nos próximos años, les meyores en conectividá del conceyu van ser significatives” – señaló l'Alcaldesa.
“Nel Plan estatal PEBA 2018, a executar antes de finales d'anguaño 2020 contempla actuaciones de Telefónica d'España y Telecable en XIBARES y LA CESPEDERA en Quimarán. Telecable empezó yá l'actuación en Xivares y Telefónica presentó'l pasáu mes d'Abril nel del Conceyu'l Plan del operador Telefónica p'actuar nel conceyu (incluyendo l'actuación subvencionada en Cespedera) y enllantar tecnoloxía Fibra óptica” - añedió l'Alcaldesa.
“Les actuaciones subvencionaes nesi plan estatal del 2018 deberíen de tar remataes, a fecha 31 d'Avientu, magar col parón motiváu pola pandemia entendemos que va haber retrasos inevitables. Lo importante ye siguir calteniendo una estrecha llínea de collaboración y coordinación ente les trés alministraciones, la estatal que tien les competencies na materia, la rexonal qu'exerz d'un llabor de dinamización y interlocución col Ministeriu y la local que conoz de primera esquito les dificultaes vecinales” – señaló Fernández.
Dende la Dirección Xeneral d'Innovación, Investigación y Tresformamientu Dixital del Gobiernu del Principáu facilitósenos este desglose d'actuaciones subvencionaes pol Ministeriu dientro del PEBA 2019 en Carreño, con compromisu de finalización antes del 31 d'avientu del @2021.
No que va d'añu 2020, nel Conceyu de Carreño presentáronse trés solicitúes d'operadores:
-Adamo Telecom Iberia S.A.O. (Adamo) solicitó llicencia p'actuar en Carreño'l pasáu mes de Febreru. Pretende esplegar fibra óptica.
-Orange presentó, a finales de Marzu, el Plan del operador p'actuar en Candás cola so tecnoloxía de fibra óptica Na villa capital yá ta enllantáu Telecable cola so tecnoloxía HFC (tecnoloxía hibrida fibra - coaxial) hasta les cases.
-Y Telefónica presentó n'Abril en rexistru municipal Plan del operador p'actuar en Carreño con tecnoloxía de fibra óptica.
“Los futuros esplegues comprometíos con financiamientu estatal nel conceyu van traer que la villa capital gocie de mayor ufierta y meyor cobertoria. Y el esplegue de Telefónica pela zona rural de Carreño con fibra óptica, con una tecnoloxía más escalable, y sobremanera, simétrica, mesma velocidá, escontra la casa, qu'escontra la rede daríennos una meyor gama de conectividá. Ye importante siguir calteniendo la coordinación interadministrativa periódica pa controlar el nivel d'execución de los planes estatales. Y ye clave que les operadores que van realizar actuaciones entaínen les mesmes”- indicó la rexidora.
“Nestos momentos, ta sometíu a consulta pública'l PEBA 2020. Como novedá nésti añu 2020 dende'l Ministeriu facilítanos xuna aplicación web, de tala forma que al traviés d'un visor cartográficu amuesa gráficamente les zones blanques y grises del territoriu” – concluyó Fernández.
Albandi
