14/5/2016 

L'asociación vecinal Santiago de Albandi, presidida por Miguel Ángel Fernández Suárez va rindir tributu a trés persones veteranes de la parroquia y al primer presidente de l'asociación vecinal nun alcuentru que va tener llugar,  esti domingu 15 de mayu,  nel Hotel Piedra de Perlora.

2016 ye un añu bien especial pa Albandi, yá que celebra'l 25 aniversariu de la creación de la so asociación de vecinal. Corría l'añu 1991 cuando un grupu de persones de la parroquia, que taben na comisión de fiestes, formaron la entidá vecinal  presidida entós por Faustino González Blanco y usaron como puntu d'alcuentru una casa antigua cerca de la Ilesia. La see foi rehabilitada por dellos residentes non ensin antes recibir una ayuda económica municipal, anque la primer xunta directiva constituyóse nel llagar de Peñon. Faustino, Tino, el primer presidente, va recibir una reconocencia en dichu atopo.

Socorro García Gómez de casa El Convento , Víctor Fernández García de casa Asturias  y Carmen Prendes Fernández asidua de casa Chelo, los trés nacíos en 1930, tamién  van recibir pola so llonxevidá  una distinción dempués de la comida de confraternización.

Tamién va haber sortéu de regalos y baille. El mesmu día, antes de la cita gastronómica, a la una de la tarde, va celebrase una misa cantada cola participación del Coru Parroquial de Perlora.