La Comisión de Pesca de Adicap
aconceyada en Candás trató la tema de la decisión adoptada poles
confrería de pescadores de Candás, Lluanco y Bañugues de nun
participar na xestión de los fondos del FEMP 2014-2020 y
llamenta fondamente esta decisión adoptada polos patrones mayores
que puede traer la perda de 685.000 € n'ayudes hasta l'añu 2022.
La convocatoria del 2017 que'l Principáu d'Asturies tien qu'aprobar
y publicar nel BOPA pa la zona de Carreño y Gozón tendría un
presupuestu de 236.000 € y perxudicaría, ente otros, a un un
pescador con un proyectu d'agospiamientos turísticos en Candás.
Según la presidenta de Adicap, Amelia
Fernández, “Nun tenemos nengún problema en sentanos nuevamente
con ellos y esclariar cuántes duldes puedan tener por que dean
marcha atrás na decisión y puedan volver participar na xestión
d'estos fondos, pero tienen qu'entender qu'estes ayudes nun son pa
siguir pescando. Hasta agora nes comisiones de Adicap solo tuvo'l
patrón de Candás porque los demás delegaron nél la so
representación”
“Nun ye xusto que los patrones
mayores argumenten que nun se ven beneficiaos por estes ayudes,
porque dende l'añu 2012 les confreríes de Lluanco y Bañugues nunca
solicitaron ayudes pa proyectos de diversificación y la Confrería
de Candás foi beneficiaria de dos ayudes, una de 9.802,47 € nel
añu 2012 pal acondicionamientu d'una aula polivalente destinada a
impartir cursos formativos y otra ayuda de 25.591,50 € nel añu
2014 pa un proyectu de recepción de visites turístiques na
confrería de Candás. Les confreríes de pescadores nunca
solicitaron un proyectu que se-yos refugara, desque se abrió la
primer convocatoria nel añu 2012 col Fondu Européu de la Pesca
2007-2013”.
“Ante l'ausencia de proyectos
solicitaos poles confrería mientres estos años, Adicap siempre
subvencionó proyectos que la reglamentación europea de pesca dexaba
y que en munchos casos tuvieron suxetos a controles ya inspecciones
que nos realizó l'alministración. Tolos proyectos subvencionaos
caracterizáronse por beneficiar al sector pesqueru directamente o
bien indirectamente al traviés del turismu, meyora de la calidá de
vida o pola so contribución al caltenimientu y preservación de la
zona costera y pongo como exemplu, ente otros, la concesión de dos
ayudes pa l'alquisición de maquinaria destinada a la recoyida d'ocle
y llimpieza de sableres, l'alquisición de dos stands pa la feria de
la conserva de Candás, la habilitación d'un cocederu de mariscos na
Cetárea de Antromero, un restorán marineru nel puertu de Lluanco,
esposiciones temporales de la hestoria pesquera nel puertu de Candás,
l'ecomuséu permanente de la hestoria pesquera nel puertu de Lluanco,
l'alquisición d'equipamientu náuticu pa club deportivu destináu a
la importación de cursos de vela a persones con diversidá funcional
nel puertu, l'alquisición d'equipamientu pa la sala espositiva de
pesca artesanal del Muséu Marítimu d'Asturies o cursos de
tratamientu d'algues o de tratamientu integral del pexe que dende
Adicap entamáronse. Dende l'añu 2012 sofitemos casi 30 proyectos
venceyaos al sector pesqueru concediendo ayudes por más de 400.000
€”– matizó Amelia Fernández , Alcaldesa de Carreño y
Presidenta d'ADICAP.
Albandi
