El Conceyu de Carreño sigue apostando pol Empléu
Públicu na prestación de servicios esenciales pal vecinderu. A
partir d'esti mes de xunetu'l Departamentu de Servicios Sociales
Municipal va ver amontada la so plantiya cola contratación d'una
Trabayadora Social.
Esta contratación ye consecuencia d'una
propuesta, presentada a la mesa de negociación pol Conceyal de
Personal Gabriel Rodríguez, de reorganización parcial de la
plantiya municipal centrada nel refuerzu de servicios básicos. Nel
que s'incluyíen ente otros el serviciu d'obres, la biblioteca y los
servicios sociales. Y resultancia del alcuerdu ente l'equipu de
gobiernu socialista y Somos pa l'aprobación del Presupuestu 2017,
nel que s'incluyía la cobertoria d'esta plaza.
El Centru de Servicios Sociales (SS.SS.) de
Carreño empecipió la so andadura nel añu 1987 cola incorporación
d'una Trabayadora Social pal desenvolvimientu de programes y
servicios que dieren respuesta a les necesidaes sociales de la
ciudadanía, garantizando l'accesu de les persones a les prestaciones
a les que tienen derechu.
Dende los sos empiezos el financiamientu d'esti
serviciu corrió al cargu de la Entidá Municipal y del Principáu
d'Asturies. Na actualidá al traviés de lo que se denomina, Plan
Alcordáu de Servicios Sociales, l'Alministración Autonómica y
Central financia'l 66,66% del serviciu, ente que l'Alministración
Local el 33,33%.
“A lo llargo de los años el sistema públicu
de Servicios Sociales foi consolidándose, creciendo y de resultes
los servicios qu'empresta'l Centru fueron n'aumentu debíu
fundamentalmente a la medría y desenvolvimientu de nueves
prestaciones como salariu social, centru de día, centros de sofitu a
la integración,..; a una meyor coordinación ente les entidaes ya
instituciones lo que dexó una mayor detección de casos; y la
conocencia polo xeneral de la población de los servicios empréstense
y la visión d'ellos como integradores y non
estigmatizadores” –comentó Cecilia
Tascón, Concejala de Bienestar Social-.
Pasu ente pasu a esti desenvolvimientu nes
prestaciones foi xenerándose una necesidá de profesionales nel
ámbitu técnico y profesional, y dende esti mes de xunetu la
plantiya del serviciu va tar formada por un auxiliar alministrativu,
una educadora social y trés trabayadores sociales.
Los ámbitos d'actuación, servicios y
demandes que dende'l Centru allugáu na cai Nicanor Piñole de Candás
atiéndense son amplios, destacando:
Prevención de la marxinación ya insertamientu
social.
Serviciu d'Ayuda a domiciliu y Tele-asistencia.
Violencia de Xéneru.
Protección a la infancia.
Prestaciones específiques pa persones mayores y
en situación de dependencia
Prestaciones pa persones en diversidá funcional.
Albandi
