Razones que legalmente torguen que pueda tomar posesión y dar en camudar la presidencia de la mancomunidá cabo peñes:

Como actual Vicepresidenta de la Mancomunidá y Alcaldesa del Conceyu de Carreño, pasu a esponer, en consultando a los servicios xurídicos de Carreño, les razones que legalmente tórguenme tomar posesión como Presidenta del ente supramunicipal. Razones que deseyo espresamente que figuren lliteralmente na acta de la sesión, pa lo cual al términu de la mesma voi dar en apurrir copia de la mio intervención.

- Primer: l'Incumplimientu del Pactu intermunicipal de creación de la Mancomunidá.

El Conceyu de Carreño, tanto na creación de la Mancomunidá, como na incorporación posterior de Servicios a la mesma tomó los alcuerdos procedentes aprobando tanto los estatutos como la incorporación de servicios a la mesma.

Ente los citaos servicios atópase estatutariamente contempláu'l de defensa xurídica. Ver artículu 8 de los estatutos vixentes. Y el Serviciu de Normalización Llingüística foi incorporáu darréu por alcuerdu ente les dos alministraciones locales.

A día de güei, el Conceyu de Gozón, de forma unillateral tomó la decisión de suprimir el serviciu de defensa xurídica y dexar d'emprestar el de Normalización Llingüística.

Nel casu del primeru, defensa xurídica remitímonos a lo que consta n'acta de la Comisión de Réxime Interior y Servicios Xenerales de fecha 7.11.2017. Na que'l Presidente de la Mancomunidá espón que la decisión como Alcalde tienla tomada.

Nel casu del segundu, el SNL dende fai más d'un añu, cuando la Técnica que trabaya nel Serviciu incorporóse (Setiembre de @2016) a otru puestu de Trabayu. Déxase d'emprestar y nun se cubre. Dende l'alcaldía de Carreño pidióse por escritu pronunciamientu y que se siguiera'l serviciu. Llevamos más d'un añu ensin él siendo un serviciu que taba subvencionáu pol Principáu. Y de facto Gozón adoptó la so decisión y dexónos ensin él. A estos fechos, hai qu'añedir una Moción de SOMOS que nun se traxo entá a una xunta, sacantes güei pretenda aldericase en puntu 6 del orde del día d'esta sesión.

Estos fechos suponen un incumplimientu estatutariu que tresforma la Mancomunidá de facto nun ente distintu al que nel so día aprobó'l Conceyu de Carreño.

- Segunda: Les duldes de la Presidencia sobro la situación contable.

La cuenta añal del 2015, espúsose al públicu, nun se formularon allegamientos. Aprobóse favorablemente con 7 votos ( PSOE de Carreño y 2 PP de Gozón), 6 votos en contra del PSOE de Gozón y 10 astenciones). Reflexándose na acta duldes sobro la mesma y espresando la Presidencia la intención de llevar les cuentes la Sindicatura. Si la Presidencia tien duldes, como espresó na contabilidá de la Mancomunidá, lo ético sería qu'antes de xestionar el relevu esclariárense toles duldes. Dende Carreño yá-y espresamos la nuesa voluntá, de que si Gozón asina lo deseye les unvíe a la Sindicatura.

- Tercera: Los incumplimientos históricos de pagos de Gozón.

El Ayto de Gozón, debe de llexislatures anteriores a la xestión del Presidente, 156.004,27 € ( años 2014 y 2015). En 2017 tien a favor so 2.183,37, a día de güei. Los impagos históricos de Gozón asítiennos que debemos en redol a 158 mil euros, siendo les empreses que dexen el serviciu de la piscina les más perxudicaes, con una facturación pindia de cobru d'unos 135 mil euros.

El consistoriu de Carreño amás de tar al día nes sos aportaciones a la Mancomunidá vien soportando, dende la so constitución, de forma unillateral los gastos corrientes derivaos de la see alministrativa de la Mancomunidá, que'l so costu añal foi informáu pola intervención a fecha 10 de Febreru de 2016 y envalórase en 13.631,50 €/añu. Tamos falando de munchos años nos que nunca reclamamos que los gastos fueren compartíos polos Conceyos.

El futuru de la Mancomunidá hai de considerase en términos d'equilibriu nes obligaciones y derechos.

El personal de la Mancomunidá nun cobró'l 1 % de la xubida salarial d'anguaño.

- Cuarta: Mancomunidá incursa en causa de disolución.

La Mancomunidá anguaño ta incursa en causa de disolución al nun afaese los sos estatutos na forma prevista na Llei 27/2013 de Racionalización y sostenibilidá de l'Alministración Local.

Asina se constata en dos talos escritos de la Sindicatura de cuentes de 5 de Mayu de 2017 y de la DG d'Alministración Local del Principáu, de 20 de Noviembre de 2017.

Tolo señalao enantes torga legalmente que yo pueda tomar posesión. Tando en causa de disolución nun procede camudar de presidencia.