La Conseyería de Desenvolvimientu Rural y Recursos Naturales publicó nel BOPA la convocatoria d'ayudes pal añu 2018 del programa Leader que xestiona, como entidá collaboradora de l'alministración, el Grupu de Desenvolvimientu Rural “Asociación pal Desenvolvimientu Integráu del Centru d'Asturies Periurbanu (ADICAP)”. 

La convocatoria tien un presupuestu total de 607.697,57 € pa los años 2018, 2019 y 2020 y ta distribuyíu por partíes presupuestaries de la siguiente forma: pa empreses privaes: 504.755,94 €; entidaes locales: 70.869,23 € y entidaes ensin ánimu d'arriquecimientu: 32.072,40 €. El plazu pa la presentación de solicitúes d'ayudes remata'l 15 d'abril de 2018. Toles solicitúes d'ayuda tán suxetes a concurrencia competitiva.

Son subvencionables los proyectos empresariales tantu de nueva creación como d'ampliación o modernización que s'alluguen en Carreño, Gozón y zona rural de Corvera y Llanera y que s'enmarquen en delles de les siguientes midíes del programa Leader: Inversiones n'esplotaciones agrícoles, ayudes a industries agroalimentarias, ayudes para l'establecimientu de sistemes agroforestales, puesta en marcha d'actividaes non agrícoles nes zones rurales (ticket del autónomu) y ayudes para inversiones a la creación y desenvolvimientu d'actividaes non agrícoles.

Tamién son subvencionables inversiones non granibles que la so promoción venga d'entidaes locales y entidaes ensin ánimu d'arriquecimientu dirixíes a formación, meyora del patrimoniu cultural y natural, enerxíes anovables y aforru enerxético, banda ancha rural, infraestructura turística y servicios básicos locales incluyíos ociu y cultura.