El Conceyu de Carreño, al traviés de la Conceyalía de Festexos, abre'l plazu de solicitú pa l'axudicación d'un chigre na fiesta de San Antonio, que va tener llugar el 13 de Xunu nel Prao de Gervasia, y otru pa San Roque, fiesta que se va celebrar el 16 d'Agostu.

"Faese cargu de les dos barraques va costar 100 euros, y van tener prioridá les solicitúes feches por asociaciones ensin ánimu d'arriquecimientu, que vaigan destinar la recaldación a fines socioculturales o deportivos a desenvolver nel conceyu" -  esplicó la conceyala de la área Paula Cuervo. 

Pa l'axudicación de chigres valoraránse ciertos criterios como la esperiencia na organización d'eventos similares, la finalidá prevista de los fondos recaldaos, una propuesta de desenvolvimientu de la tradicional puya al RAMU de SAN ANTONIO y el llistáu de los productos que se van ufiertar.

"El Conceyu de Carreño va apurrir al axudicatariu/a la toma d'eletricidá y el suministru d'agua potable, 15 mostradores, megafonía con música ambiente y micrófonu, según la estructura del ramu pa la Puya de San Antonio" - informó  la edil.

Les solicitúes pa poder optar a l'axudicación pueden presentase por rexistru nel Ayuntamientu de Carreño ente el  28 de Mayu y el 6 de Xunu, van tener preferencia solicitantes que moren nel conceyu de Carreño.

Les bases ya información pueden consultase  na páxina web municipal, www.ayto-carreno.es