Enmarcada dientro de la esposición fotográfica “Carreño y sus
Gentes”, les instalaciones del Centru d'Iniciativa Rural de Prevera
van acoyer a partir del xueves 7 de setiembre l'amuesa dedicada a la
so parroquia.
L'Asociación Cultural Candás Mariner. dientro del alcuerdu
de collaboración col Conceyu de Carreño, foi arrexuntando
instantánees, de los vecinos y vecines, poles parroquies del
Conceyu, llevando a cabu un trabayosu procesu de dixitalización y
arquivu de les fotografíes antigües vencíes pol vecinderu. Un
homenaxe a toes aquelles persones, families que formen parte del
pasáu, presente y futuru de Carreño.
“Gracies a la collaboración desinteresada del vecinderu de
Prevera, de la so asociación y de la entidá cultural Candás
Marineru vamos poder esfrutar d'esta nueva amuesa con imaxes
inédites. L'Asociación, con gran percuru, dixitalizó les
instantánees por que perduren nel tiempu, por que toos y toes
esfrutemos d'elles. Instantánees qu'en dellos casos taben nos
bagules nel desván y que fixeron, qu'a día de güei, salgan a la
lluz pasando a formar parte del arquivu históricu del Conceyu, de la
memoria de toos y toes. Una forma de nun perder los nuesos raigaños,
y de nun escaecer d'ónde venimos” comentó Cecilia Tascón-
Conceyala de Cultura.
De les casi 200 instantánees recoyíes pol conceyu pol equipu
empobináu por Tito Aramendi en Prevera, como nel restu
d'esposiciones, vamos poder esfrutar d'una selección de 60
fotografíes impreses en cartón pluma, distribuyíes en 15 paneles
nes que se repasa la hestoria de la parroquia, de les sos
xentes nel sieglu XX.
Les families que de forma desinteresada vencieron les imaxes, que
tres la so dixitalización y maquetación van tar espuestes nel
C.I.R. de Prevera fueron 5. Siendo la imaxe más antigua la recoyida
nesta localidá la de los años 40 del sieglu pasáu.
Tres Pieloro, Llogorzana, Priendes, Carrió, ye la vegada de
Prevera, “Candás Marinero” yá ta peracabando los últimos
detalles de la siguiente amuesa, que va tener llugar nes parroquies
d'El Valle y Quimarán.
La inauguración de l'amuesa de Prevera va tener llugar el
xueves 7 de setiembre a les 20 hores, nel trescursu del actu les
persones asistentes van poder esfrutar del Grupu de Teatru Amateur
“Les Ayalgues“ de Carreño. Estes muyeres carreñenses al traviés
de la interpretación d'una serie de monólogos van faenos ver la
vida d'otra manera, con una sorrisa.
Podrá vese la esposición dende'l mesmu día 7 hasta'l 21 de
setiembre nel siguiente horariu:
Martes y Xueves de 17 a 21 .hores
“Carreño y Les sos Xentes, ye más qu'una esposición de
semeyes antigües, ye la hestoria del nuesu Conceyu a lo llargo
del últimu sieglu. Son 12 esposiciones, una per caúna de les
parroquies que van tener el so llazu d'unión na amuesa final na
Antigua Fábrica d'Ortiz en Candás onde van tar presentes les 12
esposiciones, les 12 parroquies” –rellató Tascón.
Albandi
