“El costu d'agospiamientu de los
animales abandonaos l'añu pasáu, según los gastos veterinarios
qu'hubo qu'asumir pa la so atención, arreglos diversos imprevistos
del parque de maquinaria municipal, los arrendamientos de vehículos
pal serviciu d'obres, lliquidaciones d'obres en zona rural y gastos
derivaos de los servicios de xestión de borrafes son les actuaciones
que engloben el gruesu de factures de 2017 que van haber d'abonase
con cargu al remanente de tesorería. El 19,33 % del remanente de
tesorería va destinase abonar esos pagos.”, esplicó Gabriel
Rodríguez, voceru del gobiernu local.
“El Presupuestu de Gastos nun ye
capaz de prever con exactitú qué va asoceder a lo llargo del
exerciciu y ye absolutamente imposible que toles factures d'un
exerciciu entren nel Conceyu antes del 31 d'avientu del mesmu añu.
Casi'l 40 % de los gastos ensin abonar débense a una facturación
tardida de los provisores que les unviaron en 2018. El restu son
determinaos gastos que se llevaron a cabu nel exerciciu anterior
correspondientes a suministru de bienes y prestaciones de servicios,
toos ellos necesarios ya indispensables pal normal funcionamientu y
desendolque de los distintos servicios municipales. L'Alministración
local hai d'afaer la so actuación a l'axilidá y eficacia que
demanda'l vecinderu. Ye por ello que, n'ocasiones pa dar puesta
respuesta a la ciudadanía, la situación alministrativa nun s'afai
puramente al ríxidu procedimientu llegal. Los presupuestos
municipales, cuando s'aprueben, nun son inalterables y el marcu
llegal dexa dellos tipos de cambeos presupuestarios como l'aprobada
pa los gastos sobreveníos con cargu al remanente” - señaló'l
voceru municipal
“El cambéu presupuestariu
previsto tien la finalidá d'ampliar la llende del Presupuestu de
Gastos, na cantidá esacta pa cubrir les citaes factures qu'hubo
qu'asumir pa emprestar los servicios municipales. Teniendo amás en
cuenta que (tal que s'esplica nel informe de la Intervención
municipal) la reconocencia d'estos gastos nun va tener incidencia
dalguna nel cumplimientu del principiu d'estabilidá presupuestaria
según nel cumplimientu de los oxetivos de la riegla del gastu,
aprobemos esti cambéu de creitu pa entainar el pagu a provisores”,
señaló'l voceru municipal.
“Consideramos necesariu y obligáu
atender los gastos incurríos pa evitar el perxuiciu a terceros
contratantes con esti Conceyu y el correlativu arriquecimientu
inxustu. Al pretender abonar les mesmes con parte del remanente
disponible nun va causar perxuiciu a l'atención de necesidaes del
exerciciu corriente. Les factures que se someten a aprobación
correspuenden a prestaciones de servicios y suministros de bienes per
parte de terceros de los que consta factura acreditativa de caúnu de
los gastos debidamente conformada polos responsables de los distintos
órganos xestores del gastu. A tolos grupos políticos apurrióse-yos
copia detallada de la relación de dichos gastos”- añedió'l
conceyal.
“La comisión informativa de
Facienda celebrada'l pasáu llunes aprobó col votu favorable del
PSOE y les astenciones del PP y SOMOS (IX nun asistió) la
reconocencia de les factures pa les que nun había conseñamientu,
por dos causes, gastos extra sobreveníos o facturación tardida en
Xineru de 2018 de provisores, que'l so importe xube a 303.438,25
euros y la tramitación del cambéu de creitu necesaria p'abonar
diches factures con cargu al remanente de tesorería. Va Corresponder
al próximu Plenu la reconocencia d'estes obligaciones que nun
pudieron tramitase por falta de conseñamientu. Alcuerdu a adoptar
col quórum de mayoría simple”, - concluyó Gabriel Rodríguez.