El superávit presupuestariu del exerciciu 2017 va dexar a Carreño destinar 1.260.911,12 euros a inversiones sostenibles. Paula Cuervo, vocera municipal, avanzó la propuesta que'l gobiernu local va presentar a los grupos políticos coles mires de llegar a un alcuerdu ampliu que dexe que les inversiones que s'incorporen con cargu a esti remanente sían una realidá nos próximos meses.

“Trátase d'una propuesta que pretende ufiertar respuestes en distintos ámbitos, avanzar na sostenibilidá de los equipamientos públicos y garantizar la cohesión social nel conxuntu del territoriu”, esplicó la vocera del gobiernu local.

Les propuestes del gobiernu local van ser les siguientes:

·Coles mires de amontar el patrimoniu cultural del conceyu, consolidar el teatru como see permanente de les actividaes qu'añu tres d'añu acueye y amenorgar el gastu corriente que supon l'arriendu del equipamientu (4.956,74 euros brutos al mes), el gobiernu local valora l'alquisición del Teatru Prendes.

·En materia deportiva, encetar la instalación d'una pista cubierta de tenis nos terrenes del patronatu deportivu municipal, anexos al polideportivu de Candás.

·Abonu definitivo de la espropiación que se realizó pa encetar l'aparcamientu del Molín.

·Meyora de la rede de suministru d'agües na parroquia d'El Pieloro.

·N'ares de llograr una meyor accesibilidá de la ciudadanía a los servicios públicos municipales, encetar una nueva fase de los proyectos de modernización dixital de l'alministración local.

·Plan Integral de la zona rural: actuaciones n'infraestructures y equipamientos.