En relación a les acusaciones arramaes pol grupu municipal de Somos
sobre usu del autobús municipal, Cecilia Tascón, conceyala d'Educación, esplicó que "la función
primordial del autobús municipal de 24
places col que cunta'l parque móvil municipal, ye la de realizar la prestación del serviciu de Tresporte Escolar, de llunes a vienres, al alumnáu d'educación infantil y primaria que tien el so centru d'estudios nes
Escueles Rurales de Llorgozana y Quimarán-Valle y que frutu del alcuerdu cola Conseyería d'Educación
y Cultura, mientres les fines de selmana, ye l'encargáu de forma gratuita y dientro de les sos posibilidaes, de la prestación
del serviciu de tresporte a los equipos deportivos que participen na competición
autonómica “Xuegos Deportivos”, siempre que'l club nun disponga d'esi tresporte".
“Esto nun quita qu'ente medies del serviciu de tresporte escolar, l'autocar
municipal, siempre y cuando nun interfiera nel horariu de recoyida del
serviciu escolar, puede faer otros servicios de tresporte a pidimientu de les
distintes asociaciones y entidaes educatives y centros escolares
del Conceyu. Ye una ayuda más, nesti casu n'especie, que vien complementar les ayudes económiques que so la fórmula de subvenciones en
concurrencia competitiva convoca y concede el Conceyu de Carreño coles mires de contribuyir
al caltenimientu de les entidaes”, añedió la Edil.
"En nengún casu vamos tolerar que s'acuse a esti gobiernu de caltener una actitú déspota o arbitraria y muncho menos que se cuestione la capacidá de xestión
d'un serviciu común pa toles entidaes del conceyu. Somos
tendría d'esplicar si pretende modificar les condiciones nes que s'empresta'l
serviciu de tresporte escolar, referente en tou Asturies, p'aportar
a pidimientos d'otres actividaes. Nesti casu, la solicitú incluyía'l pidimientu de servicios pa 8 salíes a Uviéu a un centru de parkour y tiempu
llibre y dende el conceyu, una vegada comprobada la disponibilidad
del autobús concediéronse 2, lo que demuestra la voluntá de facilitar l'accesu de los centros educativos a esti serviciu pa otres actividaes", esplicó Cecilia
Tascón.
“Tampoco vamos consentir que se considere víctima a la comunidá educativa porque los
datos son bien claros al respective. Como exemplu d'estos pidimientos del autobús municipal pelos centros escolares tenemos el mes de febreru.
De los 20 díes lectivos (llunes a vienres), 3 díes fixo tresporte escolar,
los restantes 17, amás d'esi tresporte, tamién realizó
unos servicios a pidimientu de la comunidá educativa del conceyu, al
nun interferir esti col del serviciu escolar. L'alumnáu del Colexu San
Félix solicitó'l serviciu tantu pa la realización d'una actividá cultural
como pa dir la piscina de la Mancomunidá; el IES precisólo pa movese tamién a la piscina acomuñada, ente que
les Escueles Rurales p'actividaes culturales y el Colexu Poeta p'actividaes deportives, lo que sumó les 17 salíes extres”, señaló la Conceyala.
“Yá pal mes de marzu, en concretu'l Colexu Poeta tien solicitaes y concedíes 6 salíes al Muséu Marítimu de Lluanco. Y en el mes de mayu 5
salíes pa dir a la Piscina Acomuñada. En casu de nun concedese dalguna salida débese a que la hora de llegada a Candás pue ser cercana a la
de recoyida del alumnáu del tresporte escolar, que ye l'oxetivu prioritariu del serviciu de tresporte", prosiguió Tascón.
“Tocantes a les ayudes económiques mientres l'añu 2018 concediéronse 4.220
euros a les asociaciones educatives al traviés de les Subvenciones a asociaciones
o entidaes venceyada a la Educación”: al Ampa del Colexu San
Félix 1.125 euros ; al Ampa del Colexu Poeta 1.047 euros, Ampa del IES 1.243; y Ampa Escuela de Música 713 euros. Ente que 5.900 euros fueron
los destinaos a les Subvenciones a Proyectos Medioambientales”: Colegio
San Félix 1.816 euros ; Colexu Poeta 2.022 euros; y IES 2.061 euros. A estes
cantidaes hai sumar la contribución n'especie de la cesión del usu del
autobús municipal de forma gratuita. Más les actividaes ensin costu dalgunu pa los Centros que programa'l Teatru Prendes o la cesión gratuita d'espacios
municipales a les asociaciones educatives pa recaldar fondos”, concluyó la responsable municipal.