La cayida de la fueya recuérdanos que ye tiempu de castañes, ablanes, sidra duce pero tamién de fradadura. Ye por ello que s'empezó coles llabores de fradadura del arboláu qu'afaten numberoses cais y places de Candás.

Nos árboles ornamentales esisten trés tipos de fradadura: de formación, la que se fai mientres los primeros años tres el plantíu; escepcional, aquella que sirve p'amenorgar el volume de la copa; y de caltenimientu, la que se fai mientres tola vida del exemplar pa esaniciar aquellos elementos indeseables. Siendo esti últimu tipu de fradadura la que se ta faciendo polos servicios municipales.

"Les fradadures tienen de realizase a finales del branu o seronda o xusto primero que nazan los primeros biltos, en redol a febreru. El motivu de tener que faela nesa fecha ye que mientres el branu la planta ta nel procesu de fotosíntesis d'una manera más intensa pa llograr los azucres necesarios pa la so supervivencia. A la fin del branu estos azucres almacénense nes partes maderices y nos raigaños de la planta hasta la siguiente primavera. Polo que na seronda ye unu de los meyores momentos pa la realización de la fradadura al ser un de les dómines nes que menos s'interfier cola fotosíntesis"– comentó Onésimo Velasco, Conceyal de Xardinos y Sableres.

"Un equipu de cuatro persones pertenecientes a los servicios municipales de xardinería van ser los encargaos de realizar la xera de la fradadura de los árboles ornamentales. El trabayu a realizar va consistir n'esaniciar elementos indeseables como cañes seques o muertes, toconos, cañes en riego de frayatu o demasiao llargues,... Dos son les especies nes que se va realizar esti saneamientu, per un sitiu los plátanos londinenses" o "de solombra" y pol otru los "Magnolios". Estes fradadures serondiegues van contribuyir, según los técnicos responsables de les actuaciones, a allongar la vida de los árboles"– señaló Velasco.

"El plátanu londinense" ye un árbol de cañes abiertes y amplia copa. Ye un árbol bien llonxevu y resistente, siendo unu de los árboles de parques y paseos más utilizaos pola solombra qu'apurre. Ente que el Magnoliu" ye una especie tamién bien llonxeva, amás de decorativa pola so xamasca ovalada, grande, polencu y de color verde. Exemplos d'estes dos especies arbóreas tiénense na arbolea d'El Paseín pal Plátanu Londinense" o'l Magnoliu" que alcuéntrase na Plazoleta del Nodo"– prosiguió'l Conceyal.

"Güei martes, empezamos colos trabayos de fradadura del arboláu d'El Paseín. Una vegada rematáu los trabayos nesta zona, la llabor va dir avanzando escontra les distintes cais y places de la villa, la Baragaña,  Bernardo Alfageme, Carlos Albo, Parque Santarúa, y Parque de Les Conserveres, Pardies..."– remató'l Conceyal.