El serviciu de tresporte escolar que, hasta agora emprestaba directamente'l Conceyu de Carreño, a les escueles rurales de LLORGOZANA y EL VALLE, va pasar a ser emprestáu al traviés del Consorciu de Tresportes d'Asturies a partir del entamu del nuevu cursu escolar.

Va Ser la empresa de tresporte ALBA la encargada de realizar el serviciu tres la llicitación que realizó'l mesmu Consorciu.

“L'autobús municipal tien unos años y según normativa yá nun puede realizar tresporte de menores. Na situación de prórroga presupuestaria na que tamos anguaño resultónos imposible mercar un nuevu autocar municipal. El nuesu compromisu de protexer y ameyorar los servicios educativos del conceyu trai atender la especificidá de la educación nel mediu rural de Carreño. Polo que trabayamos pa xenerar propuestes pa consolidala y reforzala. “ – esplicó María Rosa Nodal, edil d'Educación.

“Al nun poder disponer d'autobús municipal propiu para garantizar el serviciu de tresporte escolar rural que veníamos dando, baraxamos fórmules de collaboración col Consorciu de Tresporte d'Asturies. Asina damos  un primer pasu col tresporte escolar y abrimos un abanicu posible de  meyores que se podríen concretar ameyorando la comunicación Candás – Zona rural y viceversa  ”- añadió Nodal.

“Esti tresporte a les escueles rurales va treslladar a 3 menores a Llorgozana y, siquier, 17 menores a la escuela asitiada n'El Valle” – concluyó la conceyala.

El Conceyu de Carreño va someter llueu a l'aprobación del Plenu la so integración nel Consorciu de Tresportes d'Asturies, previu analís conxuntu de la evolución d'esti serviciu y valorando la integración d'otres posibles meyores en materia de movilidá del Conceyu, preferentemente no relativu a les conexones de la zona rural.

Esta ruta escolar, que va empezar el Martes, va cuntar con acompañante.