Aprobaes les subvenciones municipales
pal FOMENTU Y PROMOCIÓN CULTURAL”. Caltiense'l plan de sofitu a
entidaes culturales locales con enraigono pa sofitar la
creatividá, la diversidá cultural y l'impulsu
d'actividaes de calter comuñal nel conceyu,
En visu a sofitar y fomentar la
realización d'actividaes, programes y eventos culturales de les
asociaciones allugaes nel nuesu conceyu, L'Ayuntamientu de Carreño
convoca añalmente una llínea de subvenciones municipales, en
concurrencia competitiva, “Pa l'actividaes de Fomentu y Promoción
Cultural” .
“Son bien variaes les entidaes
qu'allegaron a la convocatoria de subvenciones pal fomentu y
promoción cultural. El Conceyu de Carreño ayuda, cola mesma, a
sufragar los gastos derivaos de les distintes actividaes qu'entamen
collaborando col so patrociniu. A la inversión que se destina pa
estes subvenciones municipales, por casu, hai que suma-y que munches
de les entidaes tienen gratuitamente un local municipal como see de
la so organización, amás de disponer de forma gratuita del restu de
los espacios públicos municipales pal desenvolvimientu de los fines
pa les que fueron creaes. Amás, vien collaborándose, dientro de les
nueses posibilidaes con toes y cada una d'elles, nos aspeutos
organizativos de les actividaes qu'impulsen. Entendemos que unu de
los valores y pilastres fundamentales que tien esti conceyu ye la
nutrida y variada rede d'asociaciones de les que se dispon, polo que
pal equipu de gobiernu ye prioritariu enraigonar y fortalecer el
sistema cultural y a tolos sos axentes de manera que nun sía'l
Conceyu el que centralice y monopolice les manifestaciones
culturales o artístiques. Creemos qu'esto redunda nuna mayor
diversidá y arriquecimientu del panorama cultural de Carreño. A
cambéu, les entidaes desenvuelven actividaes pal vecinderu Siempre
qu'esistan opciones y sía vidable pal consistoriu sofiten les
iniciatives que se nos plantegen y que repercuten nuna meyora de la
calidá de vida de la ciudadanía” comentó Cecilia
Tascón-Conceyala de Cultura.
Les Asociaciones del Conceyu, qu'en
concurrencia competitiva, optaron a estes subvenciones culturales”
en 2018 fueron nueve entidaes. De les cuales toes cumplieron colos
requisitos esixíos na convocatoria. Les entidaes y proyectos
subvencionables n'anguaño 2018 son los siguientes:
–“Asociación Gaxarte” pa la
realización de la programación radiofónica que realiza al traviés
de “Onda Peñes” y l'organización del XX Concursu de fotografíes
de La Mar, del XXX Festival de Navidá y del VI Concursu postales
Navidá. Va Recibir como sofitu a les sos actividaes 759€
–“Candás Marinero” pa la
collaboración col documental de Pablo Moneya ¡Ay Candás!. La
organización del V Homenaxe a los Homes y Muyeres de les conserveres
de San Juan de la Arena y Candás. La realización de delles
esposiciones fotográfiques. La publicación mensual revista dixital
Candás Marineru y la Canal vídeos en Youtube de Candás Marineru.
Va Recibir como sofitu a les sos actividaes 867 € Hai
señalar que, amás, el consistoriu asumió les
impresiones en cartón pluma de les sos amueses fotográfiques y los
gastos del V alcuentru con San Juan de la Arena.
–Asociación vecinal “Logrezana
Esiste” pola organización del Amaguestu, de les actividaes
navidiegues, del Antroxu y de distintos talleres. Va Recibir como
sofitu a les sos actividaes 289 €.
–Asociación de Pensionistes y
Xubilaos “El Paseín”. Esta entidá plantegó un programa de
viaxes y escursiones culturales, xornaes d'hermandá, bailles. Amás
de cursos, talleres, charres y campeonatos xuegos mesa. Va
Recibir como sofitu a les sos actividaes 2.458€.
–Sociedá Cultural y Recreativa
“Casino de Candás”. Plantegó la organización del campeonatu
social de parchís por pareyes ya individual. Según cursos de
Bailles de salón, Zumba, y d'arte Floral. Va Recibir como sofitu a
les sos actividaes 253€
–Grupu de Baille “La Folixa
Asociación Cultural”. Entidá qu'impulsó la
realización d'intercambios culturales con otros grupos de baille
d'otres comunidaes autonómiques, según la organización del XVII
Festival Folklórico la Folixa. la ufrienda del ramu a la Virxe de
los Remedios, y la renovación de vestuariu y preseos. Va Recibir
como sofitu a les sos actividaes 2.024 €.
–“Asociación pa la Recuperación
de la Pita Pinta”. Solicitó sofitu p'abonar los gastos derivaos de
l'asistencia de xueces pal enxuiciáu de les pites na esposición
local, según la propuesta de poner en marcha un colexu de xueces
avícoles de Carreño. Va Encetar tamién la IV edición del concursu
infantil de cuentos en llingua asturiana sobre la raza autóctona. Va
Siguir col proyectu “Pon una incubadora en tu cole”. Según la
celebración d'esposiciones fora del conceyu mientres l'añu 2018 pa
dar a conocer la raza y l'esposición Avícola de Candás. Va Recibir
como sofitu a les sos actividaes 361€
–“Coro de la Bodega”. El coru
solicitó sofitu p'actuaciones en diverses nel conceyu, según dellos
rincones de la xeografía asturiana y nacional. Amás de dos
actuaciones relevantes nes que va promocionar la música coral fora
del nuesu país, una na Ciudá del Vaticanu y otra en Roma. A tal
fin, va recibir como sofitu municipal a les sos actividaes 2.169 €
–“Asociación Belenista de Candás”.
Presentó un proyectu pa realizar diversos cursos de construcción,
iniciación y perfeccionamiento II Concursu de belenes. II Ruta
de Belenes. Y celebrar la I edición del Concursu Fotográficu “sobre
la ruta de los Belenes”. Va Recibir como sofitu a les sos
actividaes 361€
El plazu de presentación de la
xustificación de les subvenciones concedíes va rematar el 30
de noviembre del 2018. La documentación xustificativa tendrá de
presentase al traviés del Rexistru Electrónicu del Conceyu de
Carreño o nos rexistros electrónicos de cualesquier de los suxetos
a los que se refier el art. 2.1 de la Llei 39/2015 , de 1 d'ochobre,
de Procedimientu Alministrativu de les Alministraciones Públiques. Y
la documentación presentada tendrá d'incluyir Memoria Técnica y
Xustificativa, amás de los orixinales de les factures cuando la
subvención sía mayor de 3.000€; nel casu de nun superar esa
cantidá nun va ser necesariu presentar los orixinales, va sirvir una
copia.