En Candás, tou tuvo llistu pa la llegada del “El Farolero” , un personaxe venceyáu a los oficios de la villa marinera güei sumíos. Cuando nun esistía llume eléctrica, el farolero yera la persona encargada d'encender los faroles de la población y caltenelos en bon estáu. De cutiu, compaxinaben el so llabor de faroleru cola de guarda y según esti encargu, teníen de tar vixilantes tola nueche dende'l momentu que se prendíen los faroles hasta l'amanecer.
Esta tarde, el Faroleru percorrió dende'l muelle hasta la Cuesta, de Santolaya al Cueto, pasando per Valdés Pumarino, baxando por Ramón y Cajal, Braulio Bustu pa concluyir na Baragaña. Por estes cais, recoyó na so nasa de xera, cartes de suaños y amores. Nos díes previos tamién percorrió delles parroquies de la zona rural, aquelles que les sos entidaes vecinales solicitaron la so visita.
Como un pregón de la mar, remando dende la Igüera llegó El Farolero a la ribera esti domingu, día 23 d'Avientu, a les 7 de tarde. En tierra esperábalu una nutrida comitiva. La so hermana La Espumera (Susana García) y la familia (Grupu de Teatru La Farola de Xixón), dos muyeres de la Paxa (Paula Riobello y Josefina Vega), la Bandina de la Banda Gaites Candás, un grupu de rederes (Grupu de Teatru les Ayalgues), un pescador col so carru (Quique “El Divino”), delles sardineres (encabezaes por Delia y Rebeca) y una docena de ocleros dirixíos por Manuel Muñiz. Tamién –na parte central del desfile- podía esfrutase d'un mundu marín de fantasía integráu por unes 30 faes y duendes marinos, una aguamala que portada Germán de casa Luis d´Antón en Perlora y una perlla preciosa a la que dió vida la candasina, María Isabel Martín.
Como reza'l poema que lu dedicó al personaxe Carmen Alonso
“Faroleru, Faroleru cada añu
somos más
los qu'equí esperamos
que nos vengas a allumar, que nos
enciendas los faroles
y anúbrasnos cola to paz, queremos
que nos ayudar a esta forma de vida camudar.”
Dende va díes, en La Matiella, un grupu de persones voluntaries trabayaron ¡a toa marcha! para atrezar les trés barques qu'acoyeron en tierra al Farolero y familiares. Beatriz Fernández, Paula Riobello y la conceyala Paula Cuervo contribuyeron a decorales con motivos propios qu'iguaron, según materiales vencíos por Pili Vega y el Club Xente Xoven de Serín. Les llanches diben sobro trés remolques que lleven trés pasqualis conducíos voluntarios de Casa Rufa d'El Valle y de Casa Ángelín de Pura, de Llorgozana.
La llancha “ Siempre Negro” de Mariano Rodríguez recoyó al Farolero. “La *Raspina” de Carlos González llevó a los ocleros y en “Bajumi” de José Miguel Uriña moviéronse les rederes.
La Peña marinera L’Altu la lleva afatiaos de mahón tamién se sumaron a la comitiva y velaron pol orde mientres el desfile.
El Gobiernu local de Carreño estima espresamente a toles persones que collaboraron y trabayaron voluntariamente pa poder ufiertar al públicu infantil esta nutrida comitiva qu'arropó al personaxe navidiegu. Y animaron al vecinderu a vistise de mahón y baxar al muelle col farol y la carta.
Albandi
