Nel añu 2000 la Organización Mundial de la Salú, de la qu'España forma parte, instauró'l 4 de febreru como'l Día Mundial contra'l Cáncer, coles mires d'aumentar la concienciación y movilizar a la sociedá p'avanzar na prevención y control d'esta enfermedá. Un día nel qu'organizaciones y persones alredor del mundu xúnense pa faer conciencia sobre'l cáncer y la llabor que se lleva a cabu pa priorizar la salú del mundu. Calcúlase que 9.5 millones de persones en tol mundu finen pol cáncer n'anguaño, esto ye, alredor de 26,000 muertes diaries, una cifra qu'inclusive s'espera qu'aumente.
Carreres, festivales, seminarios, campañes informatives y otros eventos son dalgunes de les actividaes que l'Asociación Española Contra'l Cáncer (AECC) entama redolada a estes feches y tol añu pa concenciar y educar a la población sobro cómo lluchar contra'l cáncer al traviés de pruebes de detección y la detección temprana, los bonos vezos de l'alimentación y actividá física o dexar de fumar, por casu.
“La Delegación de Carreño de la AECC va impulsar estos díes una serie d'actividaes a lo llargo d'esti fin de selmana, y a les que'l Conceyu de Carreño quixo sumase, coles mires de concenciar a la población y consiguir fondos pa siguir avanzando en llucha contra esa tarrecible enfermedá” - comentó Paula Cuervo. Conceyala de Bienestar Social.
“Dende l'Asociación trabáyase na educación en salú; en sofitar y acompañar a les persones enfermes y a los sos familiares; al financiamientu de proyectos d'investigación que dexen un meyor diagnósticu y tratamientu del cáncer. Con esti oxetivu, el voluntariáu del conceyu va distribuyir llazos verdes a toes aquelles persones que s'avere a la carpa qu'estos díes van tener instalada en dellos puntos de la villa de Candás, amás de recibir información o collaborar cola entidá. El domingu día 3 van tar na Plaza de la Baragaña y el llunes 4 de febreru nel Centru de Salú de Candás” – prosiguió la conceyala.
“A pidimientu de la vocal de la entidá en Carreño, María Antonia Morales García, dende'l vienres 1 de febreru hasta'l llunes 4, nel balcón del antiguu Conceyu, asitiáu na cai Braulio Bustu, asitióse'l llazu verde, color qu'identifica la llucha contra'l cáncer. Y el llunes 4, va camudase la llume tradicional por una en tonos verdes col material que nos unvió la AECC. Asina mesmu, van tiñise atendiendo al so pidimientu les agües del estanque del Parque de “Les Conserveres”. Les mesmes -mientres tola fin de selmana- van llucir el color verde solicitáu al ser tiñíes. Nun intentu más de concenciar y sensibilizar, y amosar el nuesu sofitu a toles persones que tán careciendo o carecieron esta dolencia y a los sos familiares” avanzó Cuervo.
L'Asociación Española Contra'l Cáncer ye una organización privada, ensin ánimu d'arriquecimientu, declarada d'utilidá pública que lleva más de 60 años trabayando pa frenar el cáncer n'España. Ta presente n'Asturies con sees n'Uviéu, Avilés, Xixón (Xuntes locales) y dende el 2016 cuenta con una see en Carreño nel Edificiu Polivalente “La Baragaña” de Candás.
La AECC, ta integrada por pacientes, familiares, persones voluntaries y profesionales que centren la so llabor en concenciar como forma de prevenir, en siguir apostando pola investigación como principal vía pa vencer el cáncer y en dar servicios de sofitu, atención y orientación de forma integral y totalmente gratuita.
Albandi
