El Conseyeru d'Infraestructures Fernando Lastra, en visita oficial güei al nuesu conceyu, tuvo na remocicada carretera CE-7, de Villar, na parroquia de Tamón, na que s'invirtieron 256.279 euros. Esta actuación consistió na llimpieza xeneral del tramu, la roza de turries, el reperfilado de cunetes y la renovación del sistema de drenaxe. Tamién se sanió la plataforma y se sustituyeron o repararon les obres de fábrica y desaguadoriu deterioraos. Amás, instaláronse 452 metros de barrera de seguridá y anovóse la señalización de la carretera.
Fernando Lastra axuntóse amás, acompañáu de l'Alcaldesa de Carreño y el Director Xeneral d'Infraestructures y Transporte José María Pertierra, cola directiva de l'asociación vecinal L'Ablanal, del barriu d'El Regueral, zona d'espansión urbanística de Candás. Nesi alcuentru, confirmó qu'el so departamentu va redactar anguaño'l proyectu d'arreglu del tramu de la CE-1 ente Regueral y Zanzabornín (El Pieloro).
La Conseyería d'Infraestructures llevó a cabu diverses actuaciones nel conceyu a lo llargo d'esta llexislatura. En materia portuaria, repintáronse les barandielles y faroles y realizóse l'urbanización de la escampada del puertu de Candás, obres que remataron esti mes. Los trabayos, con un presupuestu de 204.732 euros, consistieron na renovación de les redes de saneamientu, drenaxe y allumáu, y l'estensión d'una capa de tremáu de cinco centímetros d'espesura. Los trabayos concluyeron col pintáu de 221 places d'aparcamientu pa turismos y motocicletes.
Albandi
