Les instalaciones del Centru d'Iniciativa Rural de Albandi acoyeron esta tarde una xornada de confraternización ente la vecindá na que la gastronomía asturiana y el teatru costumista asturianu fueron los verdaderos protagonistes.
La xornada arrincó a les 14:30 hores, compartiendo mantel y platu na pista polideportiva cubierta del Centru d'Iniciativa rural de la parroquia. Asina empezó la Xornada de los Tortos entamada pola Comisión de Festexos “La Esfoyaza” de Albandi. Una asociación bien nueva pero que, en poco más de seis meses d'esistencia, llogró entamar 4 festivales culturales nos que la cultura asturiana y de xacíu la nuesas gastronomía tuvieron bien presentes. Dende primer hora de la mañana los integrantes de la comisión de festexos punxéronse manes a la obra na ellaboración casera del menú únicu: tortos, que taben acompañaos de los clásicos de picadiellu, morciella matachana o güevu fritu regaos con mueyu de quesu cabrales, pasando polos más innovadores de cebolla caramelizada con rulu de quesu de cabra. Y pa rematar una selección de postre de la casa nel que nun pudo faltar l'arroz con lleche.
Tres el reposu de la comida y la sobremesa, a les 19:00 hores na Sala Polivalente del CIR, tuvo llugar la penúltima función de la XIV “Ronda de Teatru” poles parroquies, entamada pola Conceyalía de Cultura del Conceyu de Carreño en collaboración cola Asociación Vecinal Santiago de Albandi.
La tarde teatral empecipió con una selección de los monólogos “Les Ayalgues de Carreño”.
Na actualidá siguen ensayando na Casa d'Alcuentros de Candás y tán somorguiaes na preparación d'una nueva obra teatral. L'adaptación d'una gran obra teatral de los años trenta y cuarenta del sieglu XX.
Tres elles foi la vez del Grupu de Teatru “Rosario Trabanco” de Xixón, que so la dirección de Lisardo Suárez interpretaron “Tarde de Sainetes”. Una comedia, una selección d'obres asturianes en pequeñu formatu de dellos autores. Una amuesa d'hestories distintes sobre les costumes y vezos asturianos toes elles falaes n'asturianu coloquial. Coles que'l públicu asistente pasó una tarde prestosa y risondera, enllena de rises.
El Grupu de Teatru Xixonés ye fundáu nel añu 2.000 por Elisa Álvarez y Lisardo Suárez. Dambos llevaben dende la so mocedá venceyaos al teatru costumista asturianu, onde se conocieron. Na actualidá la compañía ta formada en redol a 12 persona, incluyida Sara, la so nieta. El so principal oxetivu yera y sigue siendo contribuyir al caltenimientu y espardimientu de la cultura asturiana, al traviés del teatru. Realizaron numberoses representaciones teatrales en localidaes del Principáu d'Asturies y tamién fora d'él, como en Galicia, Madrid, Llión, Castellón de la Plana, Valladolid, Alicante,…
Albandi
