La Ministra de Sanidá, Consumu y Bienestar Social en funciones, María Luisa Carcedo, y la Delegada del Gobiernu, Delia Losa Carballido, visitaron esta tarde la villa de Candás, capital del conceyu de Carreño, pa conocer les iniciatives que'l Conceyu de Carreño ta desenvolviendo n'árees de competencia del Ministeriu.
Tres la recepción nel Conceyu, na que participó la Corporación carreñense y la Conseyera de Derechos Sociales y Bienestar, la candasina Melania Álvarez García, dieron na firma correspondiente nel llibru honores del consistoriu.
L'Alcaldesa de Carreño, Amelia Fernández, presentó a la Ministra la escuela de vela adaptada qu'empecipió en 2015 el Club Náuticu “Cuatro Vientos” de Candás. El vicepresidente d'esti club, Miguel Sánchez Granda, esplicó a la Ministra'l funcionamientu de la so escuela que se engloba dientro d'un proyectu municipal más ampliu (que recibe'l nome de “Un mar ensin barreres”). La citada escuela dexa, ente otres cuestiones que, por aciu l'usu d'enerxíes llimpies y nueves tecnoloxíes, el manexu de too el sistema de vela a persones con discapacidá y/o llimitaciones funcionales. De siguío, un grupu de persones con discapacidá funcional del colectivu ASPAYM ufiertaron a la Ministra una demostración de les posibilidaes d'estos veleros.
Otru serviciu municipal que pudieron conocer y que inclúise dientro del proyectu municipal “ Un mar ensin barreres” ye'l programa de sofitu al bañu, destináu a persones con diversidá funcional, persones mayores y persones con movilidá amenorgada. Esti programa, empecipiáu nel branu de 2013, dexa a les persones usuaries de la candasina sablera de Palmera'l tener, a la so disposición, recursos pa esfrutar de los baños de mar. El “Anfibuggy”, y les muletes anfibies, faciliten el bañu y el desplazamientu pol sable y l'ayuda de los as socorristes. Dende 2015, el programa cunta con personal de salvamentu específicu pal sofitu nel bañu.
El diseñu d'Itinerarios accesibles pol cascu urbanu de Candás (que fixo al Conceyu de Carreño merecedor en 2017 del Premiu ASPAYM na categoría “Accesibilidá urbanística y arquitectónica), y l'intervención artística “Xardín Inclusivu”, asitiáu na Plaza de La Baragaña (bona amuesa de la sensibilidá artística de persones con diversidá funcional), fueron otres de les innovadores iniciatives que l'Alcaldesa de Carreño tuvo la oportunidá d'esplicar a la ministra Carcedo y a la Delegada de Gobiernu, xuntu con otros nuevos proyectos colos que'l Conceyu va buscar consolidar el compromisu del Gobiernu d'España col vecinderu de Carreño.
La vista remató na antigua fábrica de conserva “Ortiz”, futuru Muséu de la Industria Conservera de Candás, en que les sos instalaciones saludaron a la directiva de la Banda de Música de Candás, organizadora del Festival Internacional de Música, que cuntó cola actuación del afamáu pianista chinu Schichao Zhang.
Albandi
