Marcha Xubilar a Los Remedios

La marcha xubilar andando dende Candás, va partir el próximu Domingo, 15 setiembre. Va Salir a les 11:00 hores dende la Plaza de la Baragaña pa llegar sobre les 12:30 a la redolada de la ilesia de San Esteban de Quimarán.

P'aquelles persones que por circunstancies personales nun puedan movese andando a la parroquia de Quimarán el Conceyu de Carreño, va poner al serviciu de la ciudadanía l'autocar municipal. 


Anguaño 2019 ye un añu bien especial, pos na mesma fin de selmana coinciden les dos celebraciones la del Patrón de les Confreríes de Pescadores d'Asturies y la de la Patrona de Carreño. Unos díes nel que la mar y el campu, lo marinero y lo rural  vuelven xunir los sos llazos pa faer un Carreño únicu. 

Unos llazos d'unión que se ven reflexaos, por casu, na decoración,  qu'entá perdura, de los Horros y Paneres estilu Carreño. Unes estructures tradicionales que,nesti casu, tan caracterizaes por tener grandes conxuntos decorativos, tallaos y pintaos con colores vivos, como el roxo, verde, azul, destacando nes sos puertes y fachaes. Unos colores que, de xuru, procedíen del escedente de la pintura de les chalanes del Puertu de Candás y que los pescadores candasinos intercambiaben con  llabradores de la zona en cuenta de productos de la güerta. 

Tres la celebración de la festividá del Santísimu Cristu de Candás, el 14 de setiembre, la parroquia de Quimarán celebra les Fiestes de La nuesa Señora de los Remedios, la patrona de Carreño. Y como manda la tradición, el  día mayor de les fiestes de la Virxe de los Remedios celebrase al siguiente domingu de la esaltación de la Cruz, ye dicir el domingu posterior al del Cristu de Candás, nesta ocasión, el 15 de setiembre. 

Grande ye la devoción en Carreño pola Virxe de los Remedios de Quimarán, yá que xuntu cola Virxe de Cuadonga son les dos úniques virxes asturianes coronaes canónicamente . A lo llargo del añu'l so santuariu, na Carbayera  na falda del Monte Areo ye visitáu per miles de persones, pero'l  15 de setiembre va ser un día especial de pelegrinación al llegar pelegrinos y pelegrines de tolos rincones del conceyu y de los conceyos estremeros pa honrar a la nuesa patrona.

La marcha xubilar andando dende Candás, va partir el próximu domingu 15 setiembre, va salir a les 11:00 hores dende la Plaza de la Baragaña pa llegar sobro les 12:30 a la redolada de la ilesia de San Esteban de Quimarán.

P'aquelles persones que, por circunstancies personales, nun puedan movese a cuerpu a la parroquia de Quimarán pa participar d'esta xornada mariana, el Conceyu de Carreño, pon a serviciu de la ciudadanía l'autocar municipal. Aquelles persones que deseyen faer usu d'esti serviciu tendrán d'inscribise primeramente, p'asegurar la plaza, na oficina de turismu de Candás hasta'l sábadu 14 de setiembre a les 20:00 h, yá sía presencialmente o llamando al 985-884888 o al traviés del e-mail. turismo@ayto-carreno.es

Les fiestes de La nuesa Señora de los Remedios impulsaes pola Comisión de festexos “El Pegoyu” de Quimarán van dar empiezu'l Sábadu, 14 de Setiembre hasta'l llunes 16 de Setiembre. Tolos  díes  pela nueche, y el sábadu y domingu a mediudía va haber serviciu de parrilla, nel prau de la romería, pa toes aquelles persones que lo deseyen a precios populares.