Nosotr@s: Un presente en movimientu. L'Asociación de Muyeres rurales “Nosotr@s”, que preside Josefina Vega, promueve, un años más, la yá tradicional marcha xubilar dende Quimarán a Candás.

Al traviés de les redes sociales, nel so perfil de Facebook, comunicaron a les socies que yá tán llistos los preparativos pa la marcha que va partir mañana Martes,  día 10 de Setiembre a les 16:30 h. dende'l Santuariu de La nuesa Señora de los Remedios en Quimarán.

Un añu más, va participar na mesma l'alcaldesa de Carreño, Amelia Fernández, socia fundadora d'esta entidá asociativa del conceyu.

“La vida ta llena de pequeñes coses y eses pequeñes coses dan pasu a otres más grandes. Les muyeres del mediu rural de Carreño, saben que namá pasu a pasu lleguen a consiguir los sos oxetivos, por eso nunca se paren ” – señaló l'Alcaldesa. 

“Les dolce parroquies de Carreño tan representaes nesta asociación, les sos socies son muyeres que viven en toles  parroquies  del conceyu, once d'elles núcleos rurales dispersos” – prosiguió la rexidora.

“Una de les meyores na mayor significación nel procesu de llucha pola igualdá y la equidá ente homes y muyeres ye'l mesmu desenvolvimientu del movimientu asociativu femenín y la so capacidá d'articulación. L'asociación de muyeres rurales de Carreño “ Nosotr@s”  ye un claru exemplu d'esa meyora nel  nuesu conceyu. Col so trabayu, lleven  más d'una década, nel día ente día, dando pequeños y grandes pasos, revalorizando d'esta forma'l trabayu de la muyer rural, ameyorando la comunicación coles Alministraciones y otres asociaciones. ” - concluyó Amelia Fernández.

“Nosotr@s” foi la primer asociación de muyeres legalmente constituyida nel conceyu de Carreño, surdió casi al par que'l Conceyu publicaba'l so I Plan d'Igualdá d'Oportunidaes. Esta veterana asociación cumple, xuntu col restu d'asociaciones que fueron surdiendo nos últimos años, un importante papel xenerando espacios pa la interrellación personal de les muyeres y apurriendo una serie d'actividaes que de la mesma impliquen un refuerzu psicolóxicu y emocional  bien importante pa les socies. Na actualidá amás de la Comisión d'Igualdá participen nes Comisiones de xestión de los Fondos europeos LEADER y FEMP.

Mañana, a metá del camín, na zona de Arquiella (Perlora) van habilitar en collaboración cola Asamblea Local de Cruz Roja la zona de avituallamiento pa facilitar agua a les participantes.

Van Percorrer l'antiguu trazáu de regresu a casa de les muyeres de la paxa, dende Quimarán, van xubir pola CE–3 pa enfusase en Perlora y de ende hasta Candás pol Paséu Marítimu. Faciendo una parada énte la escultura d'Antón, “ La Marinera” onde van realizar una semeya de grupu pa, como cada añu, tener una alcordanza gráfica de la espedición

Tres la semeya de grupu merendarán xuntes nun establecimientu de Candás, pa darréu, les que deseyen, allegar a la Novena del Cristu. Una vegada concluyida la novena van tornar a les sos cases nel tresporte municipal que va salir de la parada de bus, más próxima a la ilesia de San Félix de Candás.

“Participamos xuntu col restu d'asociaciones de muyeres de Carreño na Comisión de Siguimientu del Plan d'Igualdá qu'ellaboró'l Conceyu. Nesti foru de participación municipal nel que dende l'añu 2000 venimos faciendo aportaciones. Nél déxasenos visibilizar les necesidaes de les muyeres, consiguir que se diversifiquen les acciones formatives municipales llegando hasta la zona rural con programes y cursos tan novedosos como Reflexología Podal, Terapies Alternatives, Cursos d'Alfabetización Dixital, Internet aplicáu al sector ganaderu, etc...” – señaló Josefina Vega, Presidenta de l'Asociación de Muyeres.

“Los nuesos fines, tal que se reflexen nos estatutos son los que siguen:

Informar a les muyeres del conceyu sobre los servicios y recursos a los que pueden aportar.

Fomentar la participación de les muyeres rurales de Carreño en tolos ámbitos de la sociedá dende la defensa a la igualdá d'oportunidaes.

Promover y facilitar l'acercamientu de la muyeres del mediu rural a les nueves tecnoloxíes y la sociedá de la información. 

Sofitar les iniciatives de muyeres entamadores del mediu rural de Carreño fomentando la so participación nel mercáu de trabayu.

Entamar actividaes (talleres, charres, xornaes,...) de sensibilización n'Igualdá d'Oportunidaes n'otres entidaes asociatives del conceyu, Centros d'Enseñanza, Centros d'Iniciativa Rural,... nes que se da conocer la situación desfavorable de les muyeres nos distintos ámbitos de la vida social.

Promover l'usu d'un llinguaxe non sexista.

Desenvolver un llabor d'información, sensibilización y prevención con al respective de la salú, y espardimientu de materiales divulgativos editaos sobro estes temes por casu los del Institutu de la Muyer, etc...

Sensibilizar y favorecer la denuncia de les situaciones de violencia contra neñes y muyeres. Facilitar la incorporación de les muyeres de Carreño a la vida social y activa“ – añedió Vega.

“Ente les actividaes más entrañables ta esta marcha que faemos, tolos años, nel mes de setiembre. Pa ello l'asociación trabaya na recuperación de tradiciones antigües como'l percorríu conocíu como'l Camín de la Paxa, una ruta que faíen de madrugada les antigües sardineres que veníen de Candás pa vender el pexe nel Fontán n'Uviéu. Tamién tamos yá peracabando'l programa d'actividaes y talleres entorno al día de la Muyer y el Día de la Socia que vamos celebrar el próximu 26 d'Ochobre” – concluyó la Presidenta.