18/3/2015 

Nel marcu de los cursos d'estensión cultural edición 2015–2016 diversificóse la ufierta pa tolos colectivos, intentando averar la ufierta formativa a un colectivu más ampliu de persones, y per segundu añu consecutivu, caltúvose la ufierta pa persones con diversidá funcional.

D'esta miente, 7 persones con diversidá funcional de Carreño y Gozón alleguen tolos Vienres de 17 a 18 hores a esti cursu que-yos dexa desenvolver la imaxinación, potenciar l'autonomía y favorecer la integración. Un cursu monográficu de cerámica que tien una matrícula bonificada 10 € por persona.  

El cursu impártese na primer planta del centru polivalente “La Baragaña” de Candás, siendo la so monitora y responsable la ceramista candasina Rita Prendes.

A él alleguen 7 persones con diversidá funcional, Resultando del so trabayu n'equipu más d'un centenar de flores de cerámica que se van asitiar nun espaciu emblemáticu de Candás ente les cais Rosal y Valdés Pumarino, na redolada de la neurálxica plaza de la Baragaña.  

Ye precisamente la capacidá y non la discapacidá la que fixo posible llevar a bon puertu esti Xardín Inclusivu. Cuando tán creando, dando forma a la pieza cerámica la discapacidá sume.  

Una vegada probada la so potencia creativa, namás queda que'l vecinderu de Candás y quien nos visiten esfruten de les sos creaciones florales.

Esti vienres, a partir de les 18,30 h. afayen la so obra, primeramente, a partir de les 17.30 h., actuaciones con recital de vihueles de la Escuela de Música y Ciuentacuentos. Nel actu entregaranse diplomes y va cuntase cola presencia de Cecilia Tascón (Conceyala de Cultura), Lina Menéndez (Directora de Servicios Sociales del Ppdo. d'Asturies y Amelia Fernández, Alcaldesa de Carreño  

Contribuyir a la interacción social de les persones con diversidá funcional na comunidá vecinal na que viven  y amosar a la sociedá les posibilidaes de trabayu y d'espresividá de les persones, son parte de los oxetivos d'esti taller de cerámica qu'imparte'l Conceyu.