Ayeri empezaba, por tercer añu
consecutivu'l Salón de Navidá infantil na antigua Fábrica d'Ortiz,
l'actividá entamada dende la Conceyalía de Mocedá del Conceyu de
Carreño y l'Oficina d'Información Xuvenil, ta destinada a neños
y neñes ente 3 y 12 años y va desenvolvese ente'l 27 y 29 d'Avientu
y 3-4 de Xineru n'horariu de 17 a 20 hores
"Nel so primer día'l Salón tuvo
un total de 307 visites, siendo les hores de más arribación les
18:30 y 19:30 hores, esperamos que'l númberu de visites siga
aumentando a lo llargo del desenvolvimientu de l'actividá" -
comentó la conceyala Paula Cuervo.
La empresa axudicataria pa llevar a
cabu l'actividá foi El Llar Animación, que va encargase d'animar la
Fábrica d'Ortiz mientres los cinco díes que dura l'actividá.
El salón esta estremáu en 5 zones
distintes:
Enchibles: tobogán arcu iris y
cocodrilu
Talleres y ludoteca: va desenvolvese un
taller distintu cada dia y na ludoteca montaráse un pequeñu
enchible pa esfrute de los más pequeños.
Sport kids: va disponer d’una mesa de
pin pon, canasta de baloncestu, 4 en raya xigante, malabares...
Photocall: los visitantes al Salón van
poder faese risonderes semeyes colos complementos que van tener
disponibles tales como gafes xigantes, peluques, sombreros,
collares....
Espectáculos: el Salón tien un
pequenu escenariu onde va desarrollase el 29 d'avientu un
cuentacuentos y el 3 de Xineru xuegos musicales y coreografíes.
"Dende l'equipu de gobiernu
dámos-y una gran importancia a la conciliación familiar, d'ende
que mientres les fiestes escolares de Navidá desenvuélvanse
distintes actividaes pensaes pa neños y neñes como esti salón y
les colonies navidiegues nel centru polivalente" - concluyó
Paula Cuervo.
Albandi
