10/8/2016

Dende va cuatro años, nel barriu de Villar en Tamón, el vecinderu de Villar de Riba, tamién el de Villar d'Abaxo y otros barrios d'esta localidá, xúntense nestes feches pa compartir viandes y caltener viva la tradición de construyir vares de yerba qu'enguapecen el nuesu paisaxe rural, resulten de lo más típiques n'Asturies. Unu de los alma mater d'esta fiesta ye Manuel Suárez, popularmente conocíu como "Carrete". Na finca de la so propiedá ye ónde se desenvuelve esta orixinal iniciativa, a escasos metros de la fonte y llavaderu de Villlar d´Abaxo.

“Cada vez se ven menos, en Carreño, por eso de la mecanización de les llabores del campu; agora métese un tractor nel prau, siégase, dáse-y vuelta pa que se ensugue y hasta se “empaca” o se “embola” ensin tocar la yerba coles manes” – esplicó Manuel Noceda, edil de Mediu Rural.

“Equí dende va años, cada añu, xúntase'l vecinderu, caven como ta mandáu na finca pa clavar el poste, la vara, en redol a la cual van  asitiando yerba seca. Ye d'estimar que nun se pierdan les tradiciones, cuando éstes son bones y fermoses. Porque ésta ye una ocasión pa xuntase'l vecinderu, parolar, compartir unes viandes y caltener les tradición de faer vares de yerba, les meyores maneres de caltener la yerba llargo tiempu, cuando yá nun tienes sitiu nel payar o “tendejón”, a cubiertu”  - añedió'l conceyal.

El vienres empezaron les xeres propies pa construyir les vares d'anguaño. Como manda la tradición baxaron a les antigües escueles a recoyer el bollu preñáu del día del sociu y xubieron a Villar pa compartilo na redolada les vares de yerba, qu'añu tres d'añu, van construyendo. Como d'antiguo, cuando acababa la yerba facíase una fartura, en Tamón, dempués de faer cada añu una vara, el vecinderu xúntase y prepárense costielles, chorizos, tamién hai pasteles pa llambiones. Nun falta la música tradicional, la moza de Tamón, María Suárez, integrante de la Banda Gaites Candás punxo, con otru gaiteru d'Avilés, l'ambientación musical a la xuntanza. L'alcuentru vecinal enllargóse hasta pasaes les 3 de la mañana.