El próximu martes 1 d'ochobre hasta'l martes 15 abre'l períodu d'inscripción para la nueva convocatoria de los Cursos d'Estensión Cultural para'l cursu 2018-2020 qu'entama'l Conceyu de Carreño al traviés de la Conceyalía de Cultura.

Para cursu 2019/2020 ufiértense 38 acciones formatives de 15 temátiques distintes. Ufiertándose más de 400 places, distribuyíes en 1.796 hores lectives de formación. Llegando asina cada vez más llueñe nel so oxetivu de promover la participación social, la educación, la formación y la cultura, y ameyorar la calidá de vida de les persones nel ámbitu municipal.

Caltiénense'l preciu de la matrícula nos cursos y la bonificación  del 50 % nos precios de matrícula para les persones que tean en situación de desempléu de llarga duración. Para poder optar a ello, ríquese qu'acrediten nel momentu de matriculase un certificáu orixinal del Serviciu Públicu d'Empléu, nel que conste la so situación de desemplegaos/as mientres un añu ininterrumpidamente.

“Apuestes segures como cerámica, artesanía decorativa, madera o cueru comparten nesta edición con nueves acciones formatives como güertu y agricultura ecolóxica o actividaes que refuercen les tradiciones del conceyu como ye'l cursu de danza prima y cancioneru candasín o la ellaboración de mantes candasines”, esplicó Juanjo Fernández, Conceyal de Cultura.

El plazu d'inscripción va dar empiezu'l próximu martes, 1 d'ochobre hasta'l martes 15 d'ochobre de 2019,  dambos  inclusive nel siguiente horariu:

Llunes, martes, miércoles, xueves  y vienres de 9 a 13 hores.

Les solicitúes para aportar a esti programa cultural tendrán de presentase, de manera presencial, nel  rexistru xeneral del Conceyu de Carreño (Santolaya, 1-3), teléfonu 985.87.02.05. Asina mesmu, para facilitar esta xera, los  impresos orixinales de matrícula podrán descargase na páxina web municipal. www.ayto-carreno.es.

A la de matriculase van tener preferencia aquelles persones empadronaes nel Conceyu de Carreño. Les persones de fora del Conceyu van quedar en reserva, anulando la matrícula en casu d'efectuala por erru. Les places van axudicase por rigorosu orde d'inscripción nel cursu.

Con cuenta de la mayoría de les persones puedan realizar dalgún cursu, namá podrá escoyese unu preferente y un máximu de dos acutes. Y namá podrá cubrise una solicitú por persona.

“Nel casu de la llista de reserva, en primer llugar van tener preferencia los vecinos y vecines de Carreño que nun tean matriculaes n'otru cursu. De siguío los y les que sí tán matriculaos en dalgún otru cursu. Y de terceres, si entá hai places disponibles, les persones empadronaes n'otros conceyos. Les axudicaciones siempres se van faer por rigorosu orde, en función de la fecha d'inscripción de la solicitú” señaló'l Conceyal.

La presentación Oficial va tener llugar el vienres 25 d'ochobre a les 18:00 hores nel Centru Polivalente “La Baragaña” de Candás.

Entamu de los mesmos va ser a partir del día 28 d'ochobre de 2019,  primer día lectivu d'esi mes, el día que correspuenda según l'horariu previstu en cada cursu. Cola matrícula apurrirá un calendariu del cursu. Sacantes los de telar manual y artesanal y Güertu/agricultura ecolóxica que van dar empiezu nel mes de xineru de 2020.

Para los cursos que s'empecipien en xineru va volvese abrir un períodu de matrícula nel mes d'avientu, anque les persones que la deseyen tamién pueden inscribise a partir d'esti 1  d'ochobre.

L'asistencia a los cursos va tener calter voluntariu. va apurrise diploma d'asistencia a los/les participantes que soliciten. Los diplomes solicitaos van apurrise a la fin de cursu nel actu d'inauguración de la esposición de los trabayos realizaos, rematada ésta, van poder recoyese nel Conceyu. Para llograr el diploma, ríquese una asistencia de siquier el 80% de les sesiones.

Nun se va devolver de nengún importe de matrícula sacantes cursos anulaos por falta d'alumnáu o causa imputable al Conceyu de Carreño.

“De cara a les acciones que van dar empiezu a lo llargo del mes de xineru del próximu añu, dende la Conceyalía de Cultura sigue trabayándose en poder aumentar el so númberu y la temática. Asina por casu cola asociación Amigos del Horru ta diseñándose un seminariu nel que se va compaxinar una parte teórica con salíes de campu” señaló Fernández.

Tolos cursos van llevase a cabu n'instalaciones municipales, nel  Centru Polivalente “La Baragaña” , na Casa d'Alcuentros o nos CIR o en La Escuela de Sabores “LA LLARIEGA” asitiada nes antigües escueles del Regueral.