El conceyu de Carreño va pasar a
formar parte de la Rede de Gobiernos Locales comprometíos col
desenvolvimientu sostenible y la protección de la biodiversidá.
Dicha Rede ye una sección de la Federación Española de Conceyos y
Provincies (FEMP) creada en 2007 y dedicada a la promoción de
polítiques locales pal caltenimientu y usu sostenible de la
biodiversidá y el caltenimientu del patrimoniu natural.
Col dictame favorable por unanimidá
de la comisión informativa de mediu ambiente la propuesta d'adhesión
a la Rede de Gobiernos Locales +Biodiversidá, formulada pol gobiernu
local al restu de grupos, va aldericar nel plenu d'esti xueves 21 de
febreru.
“Esta Rede ta empuesta a la
promoción de polítiques locales pal caltenimientu y usu sostenible
de los recursos naturales, el caltenimientu del patrimoniu natural y
el fomentu del desenvolvimientu rural con criterios de sostenibilidá.
La collaboración ente la Federación Española de Conceyu y
Provincies y el Ministeriu d'Agricultura, Alimentación y Mediu
Ambiente contribúi a que funcione como un preséu de sofitu técnicu
a les Entidaes Locales, como la nuesa, ufiertándonos ferramientes pa
promover la medría de la biodiversidá” – afirmó Gabriel
Rodríguez, edil de Mediuambiente.
Los campos básicos d'actuación de la
Rede son la flora, la fauna, los hábitats, el mediu hídricu, la
sensibilización ciudadana y la biodiversidá como motor d'impulsu
económicu. Ríxese polo dispuesto nos estatutos de la FEMP, el so
Reglamentu de Réxime interior y les normes de funcionamientu
propies.
“Ente los nuesos oxetivos d'adhesión
figuren el promover estratexes, planes, programes y proyectos
d'ordenación del territoriu municipal que, basaos nel
desenvolvimientu sostenible del conceyu, garanticen la funcionalidad
y dinámica ecolóxica de los territorios naturales presentes,
faciendo posible, cuando sía posible, la recuperación de sistemes
estropiaos o destruyíos nel pasáu. Tamién el promover estratexes,
programes y proyectos pa caltener y amontar la biodiversidá de los
medios urbanos. Siguir coles acciones de sensibilización, pa educar
y concenciar a la ciudadanía de la importancia de disponer d'un
mediu ambiente fayadizo y con un altu grau de diversidá biolóxica,
como elementos esenciales de la salú humana y la preservación del
nuesu patrimoniu natural” – prosiguió'l conceyal de la área.
La propuesta que se va llevar a plenu
concreta yá los primeros requisitos formales necesarios pa
l'adhesión como son la designación de la representación política
que va representar al conceyu na Asamblea de la Rede. La designación
d'una representante técnica, la de la área de mediuambiente, pa
l'asistencia a xuntes y grupos de trabayu de la Rede, según
l'establecimientu d'una Comisión Técnica pal siguimientu de les
futures polítiques de protección y caltenimientu de la
biodiversidá.
“Este ye un pasu más nel firme
compromisu municipal col desenvolvimientu d'acciones
medioambientales. Como'l vecinderu conoz, tamos desenvolviendo un
Plan de meyora de la Calidá del Aire dientro de la aglomeración de
Xixón , que contempla delles midíes d'actuación y control que
venimos demandando y siguiendo puntualmente la so execución. Nos
últimos díes, los mididores, tanto públicos como los
pertenecientes a empreses privaes, tán dando unos datos de la calidá
ente bonos y bien bonos, nun rexistrándose superaciones nes
estaciones sitas nel nuesu conceyu” afirmó Rodríguez.