La entidá ensin ánimu
d'arriquecimientu “Candás Competición”, qu'apigura mocedá del
conceyu, y preside Felix Sánchez Castellanu, va entamar col
patrociniu del Ayuntamientu de Carreño y otres cases collaboradores,
los díes 17 y 18 de noviembre, el I Rallysprint “Villa de
Candás–Sidra Peñón”. El consistoriu carreñense va
collaborar col eventu con una subvención estraordinaria. que
s'alcordó por unanimidá de tolos grupos políticos con
representación na Corporación, y que xube 3.000 euros.
“El nuesu Conceyu de Carreño,
cola so capital Candás, vien demostrando al traviés del tiempu
que'l deporte ye una actividá practicada con afición y entusiasmu
por un bon númberu de los sos habitantes, collechando, nes diverses
modalidaes, ésitos relevantes de toos conocíos. Agora, tenemos la
oportunidá de ser testigos directos de la primer edición d'este
Rallysprint Villa de Candás” – señaló Amelia Fernández,
alcaldesa de Carreño.
“Toa una novedá por ser un
acontecimientu automovilísticu que'l so escenariu van ser, amás de
la nuesa villa marinera, les pintoresques y formoses parroquies
que conformen el mediu rural carreñense, a les qu'ensin dulda
allegaren un bon númberu de persones aficionaes ya interesaes, dáu'l
valumbu de la competición, coles beneficioses repercusiones de
índole comercial qu'ello va reportar a la economía local” –
añedió la rexidora.
“Espresar el sinceru
agradecimientu personal, según el de la Corporación que
presido, a cuantos patrocinadores, entidaes y establecimientos
emprestaron la so collaboración n'este, ensin dulda,
importante y novedosu eventu” – espresó Fernández.
“Y finalmente deseyar una feliz
estancia a quién nos visiten nestos díes, ocasión que munchos y
munches van tener pa conocer y esfrutar del nuesu territoriu,
encamiento encarecidamente al vecinderu del conceyu y a quién nos
visiten el máximu respetu a les normes de seguridá dispuestes al
efeuto pa esta clase de competiciones. Ensin más, a toos as repito'l
mio saludu y los meyores deseos de que'l desenvolvimientu d'esta
prueba deportiva sirva pal sanu esfrute de les persones aficionaes,
al empar que estreche llazos d'amistá y convivencia entre
carreñenses y visitantes” – concluyó l'Alcaldesa
na presentación.