Dende l'aprobación per parte de la Unesco
mientres 30º períodu de sesiones en 1999, tolos 21 de marzu celebra'l Día
Mundial de la Poesía. La Organización
de les Naciones Xuníes pa la Educación, la Ciencia y la Cultura convídanos, esi
día y toos, a cavilgar sobre'l poder del llinguaxe poéticu y el florecimientu
de les capacidaes creadores de cada persona.
La Biblioteca Pública Municipal de Carreño
“Carlos González Posada” pa celebrar esta fecha entamó un recital poéticu al
cargu del poeta Miguel Mingotes basáu nel so postreru llibro “ Poesía
2012-2016”.
Miguel Mingotes (Xixón, 1958) ye escritor,
poeta y collaborador del diariu El Comercio cola sección selmanal “Coses Míes”,
onde pueden lleese les sos reflexones dende l'añu 2007. Una mirada risondera,
poética, absolutamente personal, na que cabe de too. La so obra esbardia
inxeniu y humor en pequenes perlles. Nesti últimu llibru axunta poemes curtios
escritos a lo llargo de los últimos cuatro años nuna edición pequeña y
presentada con percuru.
En collaboración con otros artistes (Camín,
Javier del Ríu, José Arias, Jimena Rodríguez), Mingotes publicó numberoses
pieces nes que se dan cita la poesía, la ironía y la so plasmación
gráfica: “Fávila, Candás, Cinco números
de Circo, Cua, …”. En 1999 y 2006, col títulu “Ocurrencies” realizó dos
exposición nel Muséu Evaristo Valle de Xixón. Participando amás na Galería
Cornión en diverses esposiciones colectives ya individuales
“La Unesco define a la poesía como la
manifestación de la diversidá nel diálogu, de la llibre circulación de les
idees per mediu de la palabra, de la creatividá y de la innovación. La poesía
contribúi a la diversidá creativa al cuestionar de manera siempre anovada la
forma en qu'usamos les palabres y les coses, y les nueses maneres de percibir
ya interpretar la realidá. Por cuenta de les sos asociaciones y metáfores y a
la so gramática singular, el llinguaxe poéticu constitúi, pos, otra faceta
posible del diálogu ente les cultures” -señaló CeciliaTascón, Conceyala de
Cultura
La cita va tener llugar güey martes
25 d'abril a les 19:00 hores na Sala Polivalente de la Biblioteca Municipal.
La entrada va ser gratuita hasta completar aforu.
El principal oxetivu de la conmemoración d'esti día por parte de les
Naciones Xuníes, de la qu'España forma parte, ye sofitar la diversidá
llingüística al traviés de la espresión poética y dar la oportunidá a les
llingües amenaciaes de ser un vehículu de comunicación artística nes sos
comunidaes respectives. Polo que nun tenemos d'escaecer que'l primer poeta
conocíu de la hestoria n'asturianu ye'l carreñense Antón González Reguera,
Antón de Marirreguera. Y anguaño, XIV Concursu de Marcapáxines ta dedicáu a la
obra d'otra gran poeta, como lo foi y va siguir siendo, Gloria Fuertes nel
centenariu de la so nacencia” -prosiguió Tascón.
Albandi
