Esta selmana'l Conceyu de Carreño
empecipió les obres de meyora d'accesibilidá y señalización
previstes nos polígonos industriales de Carreño.
“Nel polígonu de Falmuria
vamos completar los rebaxes de los pasos de cebra previstos nel Plan
d'accesibilidá qu'ellaboramos l'añu pasáu. Tamién se van afaer
dos places d'aparcamientu destinándoles y señalizandoles pa
persones con movilidá amenorgada, concretamente nes cais Albandi y
Carrió” – señaló Gabriel Rodríguez, Conceyal d'Urbanismu.
“No que fai a meyores na
señalización demandaes pol empresariáu del polígonu y el
vecinderu de la parroquia, va instalase señalización horizontal y
vertical nel entronque de l'Avenida de Guimarán col camín
municipal( C-320) que comunica'l barriu d'El Canto. van afitase asina
les prioridaes de circulación en dichu entroque que nun taben bien
definíes y xeneraben ciertos problemes circulatorios al nun quedar
clares les prioridaes” – prosiguió Rodríguez.
Nos polígonos de Tabaza I ya II y
Prevera (Muniello) va darse na señalización de les cais atendiendo
a una antigua demanda de los representantes de les respectives
asociaciones empresariales.
“Van instalase plaques coles
denominaciones de los viales. Nomes que s'alcordaron nun procesu
participativu coles asociaciones empresariales. Nel casu de les árees
empresariales de Tabaza optaron por nomes d'aves d'Asturies pa les
siete cais de Tabaza I (cai del Malvis, cai del Cuquiello, cai de la
Parpayuela, cai de la Palomba, cai de l'Andarina, cai del Gorrión, y
cai del Bilanu) y pa les cuatro cais de Tabaza II (cai del
Xilgueru, cai de la Mavea, cai de la Pega, y cai del Verdarín). Nel
polígonu de Prevera aprobaron denominar les cais con nomes de montes
y miradores naturales. Asina van pasar a asitiase les plaques cola
rotulación que sigue: cai Monte Iroba, cai Peña del Carru y cai
Paseres del Visu. Nel Conseyu d'Árees empresariales, l'añu pasáu,
adoptaron estes propuestes de denominación de los viales públicos y
treslladáronse a la Comisión d'Urbanismu pa darréu ser aprobaes
nel Plenu Municipal.” –afirmó'l conceyal.
El total de la inversión que se va a
executar xube a 31.754,51 euros y tien el sofitu y el
cofinanciamientu del Institutu de Desenvolvimientu Económicu del
Principáu d'Asturies.
Albandi
