Esti llunes, día 24 de xunetu,  a les 12 hores nel Salón de Plenos del Conceyu de Carreño presentáronse los detalles de la Sesta Semifinal de FestiAMAS 2017 qu'anguaño desenvuélvese en Carreño  

FestiAMAS, ye un concursu musical y programa de televisión creáu, producíu y realizáu pa ufiertar la máxima visibilidá posible a les bandes musicales emerxentes n'Asturies, algama una vegada cerráu'l plazu d'inscripción en 2017 la so quinta edición y batiendo el record de grupos inscritos, que s'asitia en 158 formaciones. va desenvolvese en 8 conceyos asturianos y Carreño va ser unu más de los escenarios escoyíos pa realizalo.

“Esti festival pon en valor la bona música que se realiza n'Asturies polos nuesos grupos y sirve como escaparate p'amosar el so trabayu a tolos asturianos y les asturianes. Candás va acoyer, per primer vegada,  esti Sábadu a les 23:45h. na Plaza de la Baragaña el conciertu de semifinales nel que van participar cuatro grupos de distintos estilos pop, country americanu, rock alternativu ya indi” – esplicó l'alcaldesa, Amelia Fernández.

“Contactamos cola organización de FestiAMAS pa siguir anovando en materia de programación festiva en Carreño. Asina ufiertamos conciertos en directu con estilos de música variaos colos grupos D'aki Alhao, Voodoo Grass, Gmorky y Psycho Rubia. Pretendemos variar la programación que tradicionalmente faemos nes fiestes y  ufiertar música fecha n'Asturies en directu. Con ello, esperamos variar pa nun cayer na monotonía y atinar colos gustos del públicu más xuvenil. Tamién faemos esfuerzos por que puedan venir y volver de forma segura a les fiestes usando servicios públicos de tresporte, búhos” – esplicó Paula Cuervo, conceyala de Festexos.

“Les semifinales como la gran final que va ser n'Uviéu van ser emitíes pola Televisión del Principáu d'Asturies (TPA). Esti concursu surdió nel marcu de los Premios Amas, y ye bien importante qu'un conceyu como Carreño, con tanta trayectoria musical, se sume a la edición del FestiAMAS. Candás en fiestes atrai a muncha xente y ye un bon escaparate p'amosar la música que se fai equí. Y de la mesma que la villa marinera se amose pola televisión ye una promoción bien bona” – señaló David Serna miembru de la organización de Premios Amas.