L'equipu de deporte rural “Monte Areo” de Quimarán va
realizar una amuesa de deportes tradicionales, dientro de la
programación deportiva prevista pal día 8 de Setiembre. Van
Tar de 11:30 a 14 h. na cancha deportiva amiesta al parque
Ovidio Libardón.
El viceconseyeru de Cultura y Deporte, Vicente Domínguez, y
l'alcalde de Llanera, Gerardo Sanz, presentaron ayeri'l
programa d'actos del Día d'Asturies, qu'anguaño celebrase nel
conceyu llaneranu dende'l próximu vienres, día 8, hasta'l domingu
10.
Mientres l'actu de presentación, Vicente Domínguez fixo alusión
a dalgunos de los aspeutos más curiosos del programa. Lugo de
Llanera y les instalaciones de La Morgal van ser los centros
neurálxicos de la fiesta de la comunidá autónoma.
Nel parque Ovidio Libardón y na plaza San Isidro de la población
llanerense van tar instalaos el mercáu tradicional y la feria de
productos asturianos, amás d'acoyer la mayor parte de los actos
lúdicos y folclóricos programaos.
El parque Ovidio Lliberdón va acoyer talleres infantiles, pa
neños de 3 a 10 años; una amuesa y talleres de llabores
tradicionales, cola collaboración de “Desfaciendo maíz”, de
Pilar Vega; y una masterclass d'escanciáu de sidra, exhibición de
campeones y una degustación gratuita de sidra.
LA PROGRAMACIÓN DEPORTIVA:
La mayor parte de la programación deportiva va desenvolvese en La
Morgal. Entamáu pola Federación Asturiana de Bolos y les peñes El
Tronco de Pravia y La Cuesta de Cuideiru, el centru deportivu va
acoyer l'IV Tornéu de Bolo Batiente. Amás, en La Morgal tamién se
va celebrar un partíu-exhibición de béisbol, entamáu pola
federación Asturiana de Béisbol y Softbol; una sesión
d'esplicación técnica de disc-golf siguía d'un partíu de la
disciplina; y una esplicación de les riegles del rugby y rugby ensin
contactu, entamada pola Asociación Llanerense de Rugby. Pa los más
mozos (ente 5 y 14 años), el sábadu 9 prográmense diverses
actividaes deportives.
En cuanto al deporte adaptáu, el parque Ovidio Libardón va
acoyer talleres entamaos pola Federación de Deportes de Minusválidos
Físicos del Principáu d'Asturies (Fedema) en collaboración cola
asociación Llanera ensin barreres. Na cancha deportiva que s'atopa
xuntu al parque, el Club Deporte Rural Monte Areo de Quimarán y
l'Asociación Deportiva 6 Conceyos van averar a los aficionaos el
deporte y los xuegos tradicionales asturianos.
LA PROGRAMACIÓN MUSICAL:
Los conciertos más relevantes del programa del Día d'Asturies
van celebrase na Casa de Cultura de Lugo de Llanera, y van tener como
protagonistes a Cerezal y Los Berrones, el vienres, y a la cantante
Anabel Santiago y al grupu Avalanch, el sábadu.
L'Asociación d'Intérpretes de Cantar Asturianu y l'Asociación
del Cantar y el Folclor del Valle del Nalón protagonicen los dos
conciertos de tonada asturiana que se celebren nel parque Libardón,
onde va actuar tamién la Coral Polifónica de Llanera.
El parque y la plaza San Isidro van acoyer los pasacais y les
actuaciones de les bandes de gaites La Laguna del Torollu, Fonte
Fuécara y AC La Madreña, la charanga El Alboroto de Villabona y el
grupu Circu en la Luna.
PUERTES ABIERTES NA MORGAL:
Nes instalaciones de La Morgal va haber xornaes de puertes
abiertes nel Serviciu d'Emerxencies del Principáu d'Asturies (SEPA),
onde s'atopen el Parque de Bomberos, la Unidá Aérea y l'Unidá
Canina de Rescate; y nel aeródromu de La Morgal, coles que collabora
l'Asociación d'Aviones Ultrallixeros del Principáu d'Asturies
(UPA). El sábadu, va celebrase nes instalaciones la 49 Monográfica
del pastor alemán d'Asturies, entamáu pol Real Club del Perru
Pastor Alemán.
Nel Muséu y Circuitu Fernando Alonso va aplicase una tarifa
especial con motivu del Día d'Asturies, pa que'l so llogru ye
imprescindible la reserva previa, dada la llimitación de les places.
Albandi
