El Plenu de Carreño celebráu, ayeri
día 27 d'Avientu, refugó l'aprobación de los estatutos nuevos de
la mancomunidá (votos en contra de PSOE y PP). Los informes de los
servicios xurídicos municipales señalen la non procedencia llegal
de l'aprobación de los nuevos estatutos. La razón d'esti
planteamientu atópase na vixencia d'un alcuerdu de separación del
Conceyu de Gozón que, tomó en 2013, el plenu del conceyu vecín.
L'informe técnicu incide amás na necesidá de llegar a un alcuerdu
de restructuración dáu'l planteamientu gozoniegu de prescindir de
dalgún de los servicios que se vienen emprestando na Mancomunidá
qu'arrexunta los dos conceyos.
La segunda de les propuestes incluyíes
nel orde del día de la sesión plenaria, consistente na
ellaboración d'un estudiu técnicu de viabilidá de la Mancomunidá,
foi tamién refugada pol Plenu. “Dende'l gobiernu local
plantegamos la incorporación d'esti asuntu coles mires d'evitar la
disolución”, esplicó'l voceru del gobiernu local, Gabriel
Rodríguez.
“El PSOE de Carreño trató
d'impulsar la creación d'una Comisión Paritaria Carreño-Gozón na
que s'estudiara la situación y alzara una propuesta consensuada de
cara a recuperar la normalidá. Esta propuesta foi tamién refugada
de forma unánime pol restu de grupos políticos del Plenu de
Carreño”, añedió'l voceru socialista.
“A la vista de lo asocedío nel
Plenariu de Carreño y apostando con firmeza pola continuidá de la
Mancomunidá, l'Alcaldesa de Carreño unvió, ayeri mesmu, una
comunicación al actual Presidente de la Mancomunidá y rexidor de
Gozón, na qu'ufierta total collaboración al conceyu vecín por que,
si asina lu envalora, nun curtiu plazu, les dos Alcaldíes puedan
plantegar un documentu a los dos Plenos por aciu el que s'asegure la
viabilidá de la Mancomunidá y los sos servicios”, concluyó
Gabriel Rodríguez.
Albandi
