Coles actuaciones previstes nel
proyectu "Escueles conectaes" va garantizase un anchu de
banda mínimu importante y un accesu por wifi dende la mayoría
d'aules de los 5 centros educativos de Carreño.
Les velocidaes garantizaes van bazcuyar
ente los 150 Mb asimétricos, hasta los casi 1GB simétricos
dependiendo del allugamientu del centru.
"Escueles conectaes" ye un
conveniu trilateral de collaboración ente'l Ministeriu d'Educación,
Cultura y Deporte, el Gobiernu del Principáu d'Asturies y l'entidá
pública empresarial RED.es pa la estensión del accesu a la banda
ancha Ultrarrápida de los centros docentes españoles. Luis Llano
García, Coordinador de Tecnoloxíes Educatives del Serviciu
d'Orientación educativa y formación del profesoráu de la
Conseyería d'Educación y Cultura treslladó al Ayuntamientu de
Carreño los pormenores de les actuaciones previstes nel conceyu. El
Serviciu d'Obres y el Centru de Dinamización Tecnolóxica Local del
consistoriu carreñense va coordinase cola Conseyería y l'empresa na
dotación tecnolóxica.
“Esti conveniu ta dientro del
conveniu marco que'l Ministeriu d'Educación, Cultura y Deporte, el
Ministeriu d'Industria, Enerxía y Turismu, el Ministeriu d'Economía
y Competitividá, y Red.es suscribieron pa la estensión del accesu a
la banda ancha ultrarrápida de los centros docentes españoles.
Dichu Conveniu Marco recueye que les Comunidaes Autónomes qu'asina
lo deseyen van poder participar nel desenvolvimientu de les acciones
previstes y asina lo fixo la nuesa” – esplicó Amelia
Fernández, Alcaldesa de Carreño.
Les actuaciones que Red.es va realizar
n'execución d'esti conveniu van disponer de fondos de la UE, al
traviés de los Fondos Europeos de Desenvolvimientu Rexonal (FEDER)
correspondientes al Programa Operativu Crecedera Intelixente
2014-2020.
“El proyectu lleva delles fases,
les primeres preparatorias onde se fixo un analís de la dotación
tecnolóxica de los centros docentes sosteníos con fondos públicos
y ellaboróse un plan de trabayu. D'ende salió'l llistáu d'alredor
de 400 centros que s'incluyeron nel proyectu n'Asturies. Nel casu del
conceyu de Carreño, van vese beneficiaos los 5 centros: los dos
colexos San Félix y el Poeta Antón de Mari Reguera, el IES Candás,
y les dos escueles rurales (l'allugada en Llorgozana y la d'El
Valle). Toos ellos, van tener un anchu de banda de 500Mb simétricos
(tantu de xubida como de baxada). Agora mesmu tamos en fase de
replantego de les infraestructures a asitiar y ta previstu que
rematen toles instalaciones en xunu-xunetu de 2018” – añedió
l'Alcaldesa.
A nivel institucional, la Dirección
Xeneral de Tecnoloxía de la Información y les Comunicaciones de la
Conseyería d'Empléu, industria y Turismu ye la responsable del
proyectu na nuesa comunidá autónoma, cola que Dirección Xeneral
d'Ordenación académica ya innovación educativa, al traviés del
Serviciu d'Orientación educativa y formación del profesoráu,
collabora viviegamente.
Na fase na qu'anguaño atopamos, van
visitándose los centros per parte de la empresa axudicataria, nesti
casu Orange, planiando ónde y cómo se van instalar los distintos
elementos d'infraestructura y equipamientu que van ser necesarios
(fase llamada de replantego) pa depués pasar fases posteriores
d'instalación, validación, etc.