Nueve productores locales realizaron
una allegada degustación de sidra casera de Carreño nel conceyu
asitiáu na ribera del Ríu Nalón. Afatiaos con una camiseta editada
apocayá col logo de la entidá Sidra Casera de Carreño echaron
“culinos con estilu”, los cuálos tastiaron animadamente col
públicu asistente.
Nel conceyu de Careño, allá por 1926
esistíen alredor de 79 llagares, el mayor núcleu d'ellos
concentrábense en Perlora. Anguaño nel conceyu namá hai dos
llagares unu n'Albandi y otru n'El Valle qu'ellaboren sidra de manera
comercial, les marques de Peñón y Quimarán, pero nel ámbitu
caseru l'afición caltiense y va ganando más adeptos gracies al
impulsu de l'Asociación local de Sidra Casera de Carreño. Dende
Perlora partieron cola so sidra 9 productores locales pa ufiertar nel
Centru d'Interpretación del Horru de Bueño una esitosa degustación
de sidra casera de Carreño que tuvo la presencia del Conseyeru de
Turismu, Isaac Pola, l'Alcalde de Ribera y l'Alcaldesa de Carreño.
Al términu de la degustación los
llagareros del conceyu realizaron con otres entidaes una visita con
guía al Centru d'Interpretación. Percorríu que realizó María
Fernanda Fernández de la Consultoría y Xestión Cultural Pozu
Espinos. Horros, sidra, jazz y deporte son dalgunos de los nexos
d'unión ente Carreño y Ribera.
Félix José Muñoz de la Vega,
presidente de l'asociación, coordinó la espedición. Félix ye un
namoráu de la sidra, provien d'una familia llagarera pa ser más
esplícitos del primer llagar comercial de Carreño, Sidra
Cagarreales, que cerró les sos puertes nos años 60. Sidra
qu'ellaboraba'l so güelu Víctor de la Vega con una maquinaria de
1900, y qu'entá siguen emplegando tanto'l so nietu como los sos
biznietes Paloma García y Rosana Muñoz.
La redolada de l'antigua escuela de
Perlora, nel barriu de La Pedrera, conceyu de Carreño va volver
allugar el próximu mes d'Agostu, per tercer añu consecutivu, una
degustación de sidra casera. Gracies a esta entidá ensin ánimu
d'arriquecimientu na pista polideportiva van volver van participar
productores locales, y convidaos de Piloña y La Ribera. Tamién va
haber esposición d'oxetos antiguos de llagares del conceyu y un
dípticu esplicativu de l'amuesa.
“Vivir y conocer el mundu de la
sidra, una de les manifestaciones más característiques de la
cultura asturiana, ye daqué que nos enllena y que nos gusta
compartir con otres persones” – afirmó'l presidente de la
entidá de sidra casero de Carreño.
“Amás d'esta degustación,
fiximos dalgún cursu de formación na nuesa see, tamos esperando por
dalguna visita – alcuentru formativu con dalgún llagar
profesional-, y yá tenemos bien avanzáu'l programa espositivu que
va acompañar la III edición de la degustación. Va haber dalguna
pieza con la que vamos pretender sosprender, vamos reconocer tamién
la trayectoria d'un emblemáticu vecín que sopelexó enforma la
sidra colorada.. La cita va ser na cancha perlorina'l próximu día 5
d'Agostu” – concluyó Félix.
Albandi
