El Centru d'Escultura Muséu Antón de
Candás va cuntar con 153.630 euros de presupuestu. La so Xunta
rectora, en sesión ordinaria, aprobó'l presupuestu del muséu pal
añu 2018 por unanimidá de la xunta por dichu importe. La Xunta del
Muséu formenla representantes de designación polos grupos políticos
con representación nel consistoriu, representantes de los Centros
Educativos del Conceyu y representantes de la familia del Escultor,
ta presidíu pola Alcaldesa de Carreño Amelia Fernández.
Ente les novedaes d'esti presupuestu
aprobáu, hai que destacar, l'impulsu, per primer vegada, na hestoria
del centru escultóricu la ellaboración d'un PLAN DE CALTENIMIENTU
PREVENTIVU DEL PARQUE ESCULTÓRICU del Muséu Antón.
“Anguaño, apostamos por
considerar la realización d'un plan de caltenimientu preventivu de
los bienes muebles instalaos nel Parque Escultóricu de Candás, una
y bones les obres lleven 30 años allugaes en zones próximes al mar
col deterioru qu'esto trai. Nel ánimu d'evitar gastos mayores,
queremos trabayar nel caltenimientu preventivu de les escultures del
Parque. L'añu pasáu tuvimos que faer frente a la restauración de
la escultura”Damocles” la cuál xubió a 10.000 €.
Creemos que va ser más sostenible'l faer un plan de prevención.
Asina nesi plan preventivu van afitanos los cuidos más fayadizos por
que les inversiones nel caltenimientu nun sían tan altes. Esti plan
concíbese pos, como una ferramienta de xestión que facilite la
programación y coordinación de les xeres de caltenimientu del caúna
de les escultures instalaes nesti parque al envís d'embrivir
el so deterioru” – esplicó l'Alcaldesa de Carreño,
Amelia Fernández que preside'l Patronatu Cultural.
Amás, na sesión de la Xunta aprobóse
un ESPEDIENTE DE CAMBÉU DE CREITU pa ANOVAR LES
PUERTES d'accesu al muséu. Esti espediente de cambéu respuende
a la necesidá de camudar les dos puertes d'accesu que tien el Muséu,
realizaes en planches d'aceru que los sos marcos tán totalmente
ferruñosos. Los pequenos perfiles instalaos nes puertes son del
escultor Joaquín Rubio Camín, nel Muséu caltien un croquis a
escala ellaboráu por Camín, pal allugamientu d'estos perfiles.
“Pidiéronse presupuestos a
empreses especializaes en chapes de fierro y comentáronnos qu'hai
que camudar tanto'l marcu y como la puerta. De los trés presupuestos
que disponemos el más económicu ye de 5.000€ más IVA. Como col
nuesu presupuestu taba contempláu, tres la preceptiva consulta a la
intervención municipal, va encetase esta sustitución de les
puertes del muséu usando'l remanente de Tesorería del exerciciu del
añu anterior, yá que hubo un superávit de 7.144 €. Como esta
obra considérase inversión sostenible puede faese esi gastu con ese
remanente y nesto consiste l'espediente de cambéu per suplementu de
creitu que foi aprobáu na xunta” –añedió Fernández.
Mientres l'añu 2018 vienen
realizándose ESPOSICIONES TEMPORALES na planta baxa del muséu, en
total p'anguaño van ser seis, de les cuales trés yá se
desenvolvieron nestos primeros meses del añu en cursu. Les próximes
van ser trés esposiciones temporales que podrán visitase nel muséu
a partir del próximu 23 de xunu traten sobre:
·José Luis
Posada (Villaviciosa, 1929 - San Antonio de los Baños,
L'Habana, 2002), 23 de xunu al 2 de setiembre,
Selección de dibuxos, grabaos y
pintures realizaos n'Asturies, tres la so vuelta de Cuba en 1991, ya
inspiraos nel so paisaxe y na so singular visión d'ésta la so otra
tierra, ya que siempres se consideró tamién cubanu.
·Esther Pizarro, Beca Antón 2017,
7 de setiembre al 4 de noviembre
·Faru de Candás, 8 de noviembre al 30
d'avientu
Trátase d'una esposición fotográfica
sobre los faros d'Asturies con especial incidencia nel faru de Candás
que nel pasáu añu 2017, cumplió 100 años. Les imaxes –xunas
recoyíes nel llibru Faru d'Asturies. Cases de lluz, de
recién publicación, y otres inédites-, van acompañaes cola
esposición de pieces del faru. Collabora Roque Galcerán Saez,
técnicu de señales marítimes y encargáu que foi del faru de
Candás con una charra/conferencia…, quién ta peracabando un
llibru sobre la hestoria d'esti faru, nel qu'él trabayó años
tras.
“Amás de les esposiciones
temporales que'l Muséu Antón entama a lo llargo del añu,
qu'enllena de vida'l Muséu. Actividaes abiertes al públicu adultu
ya infantil, como son los ciclos de música, los talleres escolares,
vixentes tol añu lectivu, o los alcuentros col arte, según una
programación de conferencies con persones tan relevantes como Laura
Mier, Pablo Huerga y Faustino López” – concluyó Amelia
Fernandez.