Dientro del Plan de
renovación y meyora de los suministros d'agua potable a les
parroquies rurales del Conceyu, que'l Conceyu de Carreño ta llevando
a cabu p'ameyorar la calidá de los suministros y sobremanera les sos
característiques de caudal y presión tase executáu una renovación
d'un tramu de rede en Llorgozana. La empresa Jaime Fernández, S.L.,
que resultó axudicataria de les obres tres la llicitación
correspondiente, realiza les mesmes por un importe de 22.627 € IVA
incluyíu.
“Esti tramu de
tubería de suministru de la rede municipal en Llorgozana, dende la
Machina a la Menudina, nun taba nes debíes condiciones, por cuenta
de un antiguu movimientu de tierres que provocó'l so frayatu y de
resultes d'ello la tubería cruciaba'l vial por un conductu non
fayadizu, escurriendo en superficie al traviés d'una propiedá
privada. Con estes obres lo que pretende realizase ye una nueva
canalización pa dexar l'acometida a la Menudina en situación de
seguridá” – esplicó Manuel
Noceda, edil de Mediu Rural.
El númberu de
viviendes que se van beneficiar d'esta renovación ameyorando'l
serviciu de suministru ye de diez, amás de delles quintanas con
actividá agraria.
“Plantégase la
renovación de la rede dende l'encruz del camín de la Machina cola
carretera AS-110 hasta la gabita cola rede esistente na Menudina. Pa
ello abrirá una cabiana per camín municipal y camín de serviciu
que circula paralelu a la carretera hasta salir a un puntu nel que
puede realizase una llanca nel AS-110 y cruciar a la parte de la
Menudina. Una vegada realizada la gabita, van realizase dos acometíes
a dos quintanes” – añedió'l
conceyal.
“L'actuación
que tamos realizando inclúi'l treslláu de les acometíes de la zona
a la nueva rede puesta en serviciu, tamién el treslláu de
contadores asitiaos davezu nel interior de les viviendes a les
llendes de les parceles, agospialos n'armarios de formigón
prefabricáu, y la renovación de les acometíes domiciliaries cuando
sía necesariu, tollo según condiciones técniques debidamente
reflexaes na memoria de la obra contratada. Amás establecióse un
plazu de garantía de dos años de les obres realizaes. Periodu nel
que la empresa axudicataria va ser responsable del caltenimientu y,
teniendo de reemplazar por otres nueves toes aquelles que resulten
estropiaes o deterioraes por cualesquier causa, o nun funcionar
debidamente por causes que-y sían imputables”
– señaló Noceda.