Nel marcu del conveniu de collaboración suscritu ente'l Conceyu de Carreño y la Fundación FASAD, que xestiona'l centru rexonal d'atención a la dependencia de Carreño, la policía local vien realizando una serie d'acciones divulgatives col colectivu de persones adultes con diversidá funcional qu'alleguen el Centru de Sofitu a la Integración de Candás.
“La función policial presenta dos cares: una na que se destaquen les actividaes que tienen que ver cola persecución de quien infringen Lleis y Reglamentos; y otra más “asistencial”, como la que se ta desenvolviendo nel centru polivalente, enfatizándose les xeres que tienen que ver col auxiliu a la ciudadanía, y velando pol so bienestar” señaló Onésimo Velasco- Conceyal de Seguridá Ciudadana.
“Al traviés del este nuevu taller trábayase col colectivu cómo identificase, cómo pidir ayuda etc. unos conteníos que dexen familiarizalos, colos sofitos fayadizos, por que puedan progresar n'autonomía personal, desenvolvese y desendolcase” prosiguió'l Conceyal.
“Si'l primer taller celebráu en xunu trató sobre les distintes situaciones nes que puede intervenir la seguridá como tema global hasta llegar al conceutu de peligru y saber cómo actuar ante eses situaciones, esta segunda edición la temática foi “La Identidá”. Dende la nuesa nacencia empieza un procesu a partir d'unes condiciones propies, internes (la forma de pensar o de ser) y esternes (les nueses traces personales) que fai que cada persona sía única ya irrepetible. Polo que l'oxetivu de la sesión foi entender como aquelles persones que nun nos conocen son capaces de saber quién somos, como pueden estremanos, reconocenos ya identificar les nueses necesidaes” comentó Antonio Molina- axente instructor de los dos talleres.
Pa ello, trabáyase nestos aspeutos:
· Les señes d'identidá esterior o traces personales que pueden llegar a estremanos unos d'otros as, como pue ser los distintos tipos de color de pelo, de güeyos, de la piel, o daqué tan personal como ye la buelga dactilar, única en cada persona.
· Los Datos personales. A esa buelga dactilar única hai que rellacionala con una persona, con un nome y apellíos. Trabáyase col colectivu na reconocencia ya identificación d'estos dos aspeutos.
· Documentación Personal, na que queda rexistráu les nueses traces y datos personales y fai qu'identifiquemos como una persona única. Analizáronse los distintos documentos qu'esisten, dni, pasaporte, carné de conducir,… informándo-yos de cualos son necesarios que siempres lleven consigo, a quien tienen d'enseñá-ylos y les consecuencies de llevalo enriba
“Nel Centru, les profesionales, con quien trabayen a diariu, yá s'encarguen d'empresta-yos asistencia y d'ocupase de la recuperación de les sos capacidaes funcionales. Dende'l Consistoriu, al traviés de la policía local, trabayamos pa desenvolver unos materiales pa trabayar nes sesiones. Conteníos afechos a les sos singularidaes y que dexen la promoción de les condiciones pal exerciciu de los derechos fundamentales, y especialmente los de llibertá y seguridá personal” prosiguió Molina
“Les persones con discapacidá intelectual y del desenvolvimientu, polo xeneral, suelen tratar colos policías (por orde d'importancia d'actuaciones) cuando han de ser socorríes o rescataes, por tratase de víctimes o autores de delitos, ser topaes dempués d'una desapaición, o, a lo último por vese arreyaes n'infracciones alministratives, inspecciones y rexistros, o controles ya identificaciones. Magar ye ciertu que, afortunadamente, en númberu absolutu nun son munches les persones con discapacidá intelectual que se ven implicaes n'actividaes con axentes policiales nun ye relevante en Carreño, trátase d'un colectivu nel que la prevalencia de delitos cometíos contra ellos ye hasta diez vegaes sobre la población xeneral. D'ende la importancia de trabayar con ellos y elles meyores na so autonomía, seguridá y qu'apriendan a identificase” siguió l'Axente de Policía.
“Esti trabayu pioneru en Carreño, que ta encetando l'axente Molina, facilítase una conocencia en seguridá ya identidá y al cuerpu policial facilíta-y emprestar un serviciu al altor de les sos necesidaes cuando tengan qu'interactuar con elles y ellos, nun formatu amigable y, sobremanera, prácticu, ensin tecnicismos” remarcó'l Conceyal de Seguridá Ciudadana
Pero esta nun foi la única formación que nesti mes de febreru les persones usuaries del Centru de Sofitu a la Integración asistieron a un taller nel qu'aprendieron faer la reanimación cardiopulmonar impartíu pol Serviciu Médicu de la Mancomunidá Cabo Peñes y l'enfermera de urxencia Mónica Álvarez Jalón. Esti taller encuádrase dientro del proyectu educativu de la escuela Rural Quimarán-El Valle, al traviés del cual y cuntando cola participación de tolos centros sociu-educativos del Carreño ta dándose formación nesti sentíu y tase grabando un video clip, nel que los docentes realicen la maniobres de reanimación nun supuestu de parada cardiaca.
Albandi
