La Comunidá d'Agua d'El Pieloro, celebró apocayá
nel salón d'actos del CIR d'El Pieloro una asamblea col fin de
tratar na mesma, la posible cesión del serviciu de suministru d'agua
al Conceyu de Carreño. Pidimientu ésta que yá se treslladó dende
la directiva de la Comunidá a esti Conceyu.
Cincuenta años más tarde de la so puesta en
marcha como rede vecinal, alcordaron, por unanimidá, el dexar la
rede vecinal al Conceyu de Carreño. A la xunta, moviéronse la
Alcaldesa de Carreño y el conceyal de Mediu Rural, según personal
municipal, pa facilitar tola información sobro l'asuntu a tratar.
“Apurrióse-yos un modelu de cesión que
tendríen de rellenar y apurrir nel rexistru del consistoriu nel casu
d'aceptar dexar el serviciu y pasar a ser ésti municipal. La
interventora, Teresa Salamanca, esplicó los cómo son los cálculos
de la tarifa municipal d'agua, basura, alcantarelláu y saneamientu
según les ordenances municipales vixentes y la Llei 1/2014 del
impuestu sobre afecciones ambientales del usu de l'agua (canon de
saneamientu) apurriéndo-yos una nota informativa pormenorizada con
exemplos de tarifes según la tipoloxía d'usuarios. El consumu
mínimu que se toma como base de cálculu son 30 m3. Esti canon
págase pol caltenimientu de contadores y depende del so calibre, el
más habitual esi 0,70 € al trimestre: L'importe de basura pa la
zona rural ye de 10,20 € al trimestre. El xefe d'equipu de
fontanería analizó cola comunidá l'estáu de caltenimientu de la
rede vecinal, treslladándo-yos les inversiones que debería costear
el Conceyu, unos 30 mil euros primeramente, pa poder asumir conforme
a la normativa y garantíes sanitaries l'actual rede“ –
esplicó Amelia Fernández, Alcaldesa de Carreño.
La Comunidá d'agües empresta serviciu a 141
families, 124 de Carreño y 17 de Gozón. Empezó la so andadura
en 1966. Trés propietarios de dos manantiales, Jenaro García,
José González y Álvaro García, vencieron gratuitamente los
mesmos y la concesión de parte de los terrenos de les sos finques pa
salir dende ellí l'agua, asitiar arquetes de captación y construyir
los depósitos de captación necesarios p'abastecer la parroquia. El
9 de Xunu de 1968 llegó per primer vegada l'agua a les viviendes
d'El Pieloro. El vecinderu recibió nes sos cases con muncha allegría
como si de la meyor folixa va tratase. Hasta finales de la década de
los años cincuenta del sieglu XX, lo mesmo en Candás que nel restu
de la zona rural de Carreño, les fontes y llavaderos públicos yeren
los principales puntos de suministru d'agua potable, o los llugares a
onde allegábase p'abogadar de la casa o abebentar el ganáu con tolo
qu'ello traía de trabayu pa les families.
La paulatina dotación del serviciu d'agua a les
viviendes del conceyu adoptó fórmules y ritmos variaos en función
de les característiques demográfiques de los distintos territorios.
El vecinderu de la zona rural túvose qu'enfrentar mayores torgues.
Al tratase d'una población esvalixada nun bastaba cola mera
iniciativa individual; esixía acoyese a fórmules asociatives dende
que les sos plataformes resultaba más probable faese oyer y, a
última hora, más fácil percanciar y llograr la imprescindible
collaboración de l'alministración local. Les coses
escurrieron de forma distinta na capital del conceyu.
La execución de la rede d'agües nel cascu urbanu
de Candás foi una iniciativa promovida por el mesmu Conceyu,
interesáu en favorecer el desenvolvimientu urbanu ya industrial de
la villa. El proyectu orixinal, redactáu en1918, sufrió socesivos
cambeos y demorances por cuenta de la renuencia de munchos vecinos a
dexar el pasu de la trayida d'agua poles sos propiedaes. Hubo
qu'esperar a xunetu de 1921 pa dar empiezu a unes obres que
s'enllargaron mientres dos años.
A partir de los años 50 del pasáu sieglu,
munches families de la zona rural entendieron la conveniencia de
poner en marcha fórmules asociatives que xunieren a dellos
vecinos/es en redol al oxetivu común y prioritario de "traer
l'agua a la puerta de casa". Variaes yeren les meyores d'esta
collaboración; dalgunes yeren económiques, porque toos contribuyíen
a cubrir los gastos derivaos de la compra/rexistru d'un manantial, lo
mesmo que de los causaos poles obres d'execución de les
infraestructures necesaries pa la captación, almacenamientu y
distribución de l'agua. Amás, les comunidaes d'agües dexaben
ellaborar nel so senu unes determinaes riegles estatutaries
empobinaes a la preservación del interés común y d'obligáu
cumplimientu pa quien la integraben. Atendiendo en parte al volume
d'agua qu'esquitara y en parte a les necesidaes de les families
usuaries, constituyéronse en Carreño comunidaes bien distintes,
dientro d'un abanicu que podía dir dende les concesiones pa usu de
dos o trés cases vecines, de les que tenemos como exemplu'l
manantial que comparten Casa Ablonda y Casa Xuan, en Sopeñes; o'l
qu'abastez a les families de Xoaquín y Casa Alfredo'l Mineru, nel
Barriu Fuentefría, dambos n'El Valle; pasando poles pequenes
comunidaes p'atender barrios allegantes como los de Rodiles,Friera,
el Prau y La Torre, en Perlora, hasta les comunidaes
qu'empresten serviciu a numberosos propietarios, como la concesión
de l'Agua de la Regatada, nel barriu de Sopeñes parroquia d'El
Valle, del que se beneficien una decena de viviendes; la Comunidá
d'Agües del Rebuñón o Rebullón, qu'atiende a les families de los
barrios de Xelaz, Castañéu, la Cuesta y Reconco, en Prevera; o esta
d'El Pieloro, que xestionaba l'agües pa toa la parroquia.
Nel añu 1968, llega'l serviciu de suministru
d'agua vecinal a El Pieloro. Funcionó mientres unos díes y
cortóse el día 19 de xunetu pa dar en asitiar contadores y faer les
instalaciones definitives. A partir d'esa fecha y hasta l'actualidá
emprestó'l serviciu pola comunidá d'agües. Mientres tou esti
tiempu dirixiéronlo desinteresadamente 8 Presidentes. Son
los que siguen: Benigno Peláez, de Casa Amasio, José Rodríguez de
Casa Rafael, Olegario García de Casa Perucho, Ramón Gutiérrez de
Casimira, Gabino González, José Rodríguez de Casa El Llanu, José
Ramón García de Casa Perucho, Juan Rodríguez, de Casa El Llanu y,
na última etapa Julián Rodríguez, de Casa Rafael, ésti postreru
va dos años treslladó a la directiva la so intención d'abandonar
la presidencia. Pidió la collaboración de 9 persones que pudieren
asumir el llabor altruista qu'hasta agora veníen desempeñando les
directives vecinales y nesi periodu nun apaecieron persones que
tuvieren capacidá y disponibilidad p'asumir les xeres de xestión de
la rede, caltenimientu de tuberíes y manantiales, cloración y
arreglu d'averíes. Al nun tener efectivos pa siguir al mandu de la
xestión de la comunidá d'agües treslladóse la pidimientu al
consistoriu de Carreño por que ésti integrase la rede pública
municipal.
“Conocida la voluntá vecinal el Conceyu ta
trabayando nos asuntos técnicos y xurídicos qu'haya qu'encarar
primeramente pa faese cargu de dicha cesión de la rede vecinal
d'agües. Hasta la fecha, un 16,31 % de les families usuaries de
la Comunidá d'agües yá apurrieron nel rexistru municipal la so
conformidá espresa a integrase na rede Municipal del Conceyu de
Carreño. Va Haber qu'esperar que la apurran el restu pa ellaborar
los padrones d'agua correspondientes con datos actualizaos. va
riquise tamién l'alcuerdu políticu necesariu p'atender el
pidimientu y a avanzar na realización de les obres iniciales que yá
propunxo'l xefe d'equipu de fontanería, según revisar contadores
actuales esistentes. Una vegada estudien estos los técnicos vamos
saber si se afaen a lo que se precisa o si tienen d'anovase dalgunos
de ellos” – concluyó
l'Alcaldesa.