Por segundu añu consecutivu, el Conceyu de Carreño pon en
marcha'l programa “Un Mar Ensin Barreres”. Un programa al traviés
del cual pretende dase un serviciu d'atención a persones mayores y
con movilidá amenorgada na sablera de Palmera en Candás. Amás
d'aprovise de personal que refuerce les atenciones qu'empresta'l
serviciu de salvamentu mercáronse una serie de Muletes Anfibies y de
una Siella Anfibia modelu “Marina”.
“La siella adquirida tien Gran flotabilidá y estabilidá :
dispon de dos apoyabrazos flotadores y de ruedes anches que dexen el
desplazamientu sobre cualquier terrén (sableres, piscines con
rampla,...). Ye alcontradizu y bon usu, facilita la tresferencia de
persones con movilidá amenorgada pa bañase o folgar nuna posición
bien alcontradiza. Diseñu y comodidá, ta fabricada con materiales
d'alta resistencia, de bona llimpieza, desmóntase y pliégase rápido
pal so tresporte o almacenamientu nel serviciu d'obres. El respaldu y
el reposapiés son de malla de poliéster lo que favorez:- el
desallugu de l'agua y del sable, una mayor ventilación y confort de
la persona sentada. Per otru llau, les muletes tienen mayor
superficie de contactu, polo que nun se claven nel sable, son de
materiales d'elevada resistencia al escomiu y cola flotabilidá
qu'otorguen a quien les lleva facilítanos el sofitu al entrar na
agua” –esplicó la conceyala de Bienestar.
“Un Mar ensin Barreres” facilita, previa reserva,
una atención na sablera de Palmera más integral y polivalente. Esta
atención ta enfocada a les persones con diversidá funcional según
la so discapacidá, persones mayores, y/o persones con movilidá
amenorgada. Col fin de facilita-yos a ellos/es y a les sos
families l'usu y esfrute de la sablera incluyíu'l bañu. Son
intervenciones específiques que favorecen la inclusión social na
redolada como'l desenvolvimientu de la so autonomía personal.
“Una de les llabores de los Conceyos, al ser l'alministración
más cercana a la ciudadanía ye la de velar por que toes les
persones puedan esfrutar d'una calidá de vida en condiciones óptimes
y que n'igualdá de condiciones puedan optar a esfrutar de tolos
servicios que dende l'ente local pónense a la so disposición. Ye
por eso que se produció la compra d'estos materiales por que toes
persones en condiciones de movilidá amenorgada, mayores,
vecinderu o visitantes, puedan optar a pasar una xornada lúdica nel
nuesu arenal” –comentó Cecilia Tascón, Conceyala de Bienestar
Social.
El nuevu material adquiríu pol Conceyu de Carreño consta d'un
llote de Muletes Anfibies en delles talles y soporte. Estes
muletes tán diseñaes p'ameyorar la calidá de vida de les persones
facilitando l'accesu a la sablera, mayor comodidá y llibertá de
movimientu pal esfrute del bañu. Tienen una mayor superficie de
contactu, lo qu'evita que se fundan nel sable, ameyorando asina'l
desplazamientu pola sablera. Y una flotabilidad que facilita'l sofitu
al entrar a l'agua. Amás tienen una gran durabilidá y soporten
condiciones adverses como'l sable o l'agua por cuenta de la so
resistencia al escomiu y el so flotabilidad.
“A estes compres hai que sumar la contratación de personal de
salvamentu especializáu encargáu d'emprestar sofitu al programa “Un
Mar ensin Barreres” . Amás embaraxamos l'alquisición d'una
pasareles accesible más fayadiza que la esistente pa les
persones con movilidá amenorgada. Na actualidá los servicios
técnicos de la casa tán estudiando cual podría ser la más
fayadiza dáu les característica de la nuesa sablera” –señaló
la Conceyala.
Pa poder aportar a esti programa de bañu con sofitu ye necesariu
solicitalo, siempres, con cita previa y reserva alcordada. Na Oficina
de Turismu asitiada na cai Braulio Busto (baxos de la Plaza de la
Baragaña), llamando al teléfonu 985884888 o traviés del
email turismo@ayto-carreno.es. Una vegada presentada la
solicitú'l personal adscrito a la oficina de turismu va ponese en
contactu col personal de salvamentu pa coordinar la xornada y
confirmar si hai disponibilidá d'emprestalo o si pela cueta hai que
buscar nueva fecha. Esti serviciu emprestaráse los Xueves, Vienres, fines de selmana
y díes Festivos. Los sofitos tienen una duración de 60 min. por
persona y día. van emprestase, nos díes señalaos, nel horariu de
11,30 a 19,30 h.
La siella anfibia adquirida y les muletes van ponese n'usu'l
próximu llunes, 23 de xunetu na mañana. coincidiendo col alcuentru
branizu, qu'añalmente entama nel nuesu conceyu l'Asociación de
Persones Con Mancadura Medular y Otres Discapacidáes Físiques
(Aspaym). Amás de bañase na sablera los sos socios y socies van
esfrutar d'una xornada de vela al cargu del Club Náutico Cuatro
Vientos de Candás. L'actividá taba prevista pa esti Vienres, pero
por razones climatoloxíes retardóse al llunes próximu.
Dende va años el Club candasín “Cuatro Vientos” tres
l'alquisición d'una serie de veleros pa la realización de Vela
Adaptada dispon d'esti serviciu pa toes aquelles persones amigues de
navegar pero que por cuenta de la so situación personal precisen,
como ye esti casu, de veleros afechos pa la so práctica y personal
de sofitu. El Club pa tal fin dispón de personal con bien bona
formación y de sofitu pa la realización d'esta actividá. Delles son les solicitúes de reserva, amás de la de Aspaym, que
la Oficina de Turismu recibió. D'esta forma nel mes d'agostu les
persones pertenecientes al Centru Especial d'Empléu APTA y Ascivitas
van visitar el nuesu conceyu y van poder esfrutar d'una xornada
playera y de vela.
“Al programa “Un Mar ensin Barreres” qu'incluyía'l
serviciu de Vela pa discapacitaos qu'empresta'l Club Náutico “Cuatro
Vientos”, o a los cursos de pesca pa persones con movilidá
amenorgada qu'este mesmu club imparte, a los baños accesibles
nel arenal, personal de salvamentu especializáu y de sofitu, agora
hai que sumar l'alquisición d'una serie de Muletes Anfibies y de la
Siella Anfibia “Marina” tou n'ares de faer accesible pa tolos
públicos la ufierta lúdicu, festiva, deportiva,… que'l conceyu
ufierta a la ciudadanía” –remató Tascón.
Albandi
