Casi un centenar de persones de la
parroquia carreñense de Prevera diéronse cita güei 26 d'agostu nun
establecimientu hosteleru. Convocaos pola entidá vecinal “San
Juan” de Prevera que preside Juan Díaz, celebraron una comida de
confraternización y distinción a los sos mayores.
Nesta edición, coyendo'l testigu del
últimu homenaxe a Isolina y Pepe el Viudo, los homenaxaos fueron:
-Juan Martínez González, popularmente
conocíu como “Juan de Herminio” de 84 años d'edá. Casáu con
Mari, con una fía de mancomún, Begoña y dos nietos. Juan rexentó
cola so muyer una tienda de comestibles en Xixón hasta la so
xubilación.
-Clementina González Rubio, conocida
como “Clementina la de Jenaro” de 86 años d'edá. Afamada
cocinera que rexentó hasta la so xubilación los fogones de Chigre –
Rte. Casa Jenaro en Prevera. Viuda de Jenaro, taxista de la zona
rural de Carreño. El matrimoniu tuvo dos fíos Montse y Jenarín.
Tien dos nietos.
Foi un actu senciellu, pero con muncho
sentimientu a flor de piel.
L'Alcaldesa de Carreño, Amelia
Fernández, allegó al actu xuntu con conceyales de la Corporación.
“Dende la Corporación, como nun
podría ser otra manera, sumámonos a esta merecida reconocencia
pública. Les persones mayores de cada parroquia son merecedores del
nuesu ciñu y atención porque a lo llargo de les sos vides
contribuyeron de forma decisiva por que les sos families y el conceyu
polo xeneral crecieren, ameyoráu la so calidá de vida y sigan
siendo dinámicos. Cada mayor de Prevera, como cada mayor de Carreño,
diva poder escribir un llibru bien ricu ya ilustrativu coles sos
vivencies. Seguro que cada llibru iba ser una hestoria viva,
quiciabes bien distinta poles vivencies personales, pero fixu dignu
de lleer. A cada persona tocó-y vivir de too: penuries, fame,
guerres, miseries, perdes de seres queríos, enfermedaes..., pero
tamién fondes allegríes, matrimonios, fíos, nietos, años de
bonanza, amistaes eternes. Persones como Clementina y Juan diéronnos
el so trabayu, sudu, amor y ciñu, y agora apúrrennos una
esperiencia de vida que ye la verdadera ayalga y el verdaderu legáu
al conceyu” – treslladó l'Alcaldesa.
“En nome del Ayuntamientu, gracies
per tantu que nos distis ensin esperar nada a cambéu. Vistis a la
vuesa xente, a la vuesa familia y al vuesu pueblu crecer en tolos
sentíos y algamar un bienestar impensable naquellos años 30. Por
eso, queremos davos un pequeñu detalle institucional, un símbolu
como reconocencia de too que nos apurristis y apurrísnos na
actualidá" – afirmó Fernández.
Albandi
