El Centru Polivalente “La Baragaña”, acueye la esposición de Global Humanitaria ‘Hambre y Seguridad Alimentaria’, que va poder visitase del 1 al 15 d'ochobre de llunes a vienres: de 9 a 22h. Sábados y Domingos de 10. a 13. y de 16.30 a 21.00 hores, presentando al públicu les causes de la fame y les sos soluciones

Si en 1990 un 23,3% de les persones de rexones en desenvolvimientu teníen una nutrición insuficiente, en 2015 esti porcentaxe cayera hasta casi la metá y representaba un 12,9%. A pesar de les meyores, sicasí, casi 795 millones de persones pasen fame nel mundu. D'elles, el 70% son muyeres. La amuesa ta integrada por 10 paneles informativos que repasen les causes y consecuencies de la fame na crecedera, la educación y el progresu social nel marcu de l'axenda de los Oxetivos de Desenvolvimientu del Mileniu y de la nueva axenda d'Oxetivos de Desenvolvimientu Sostenible, qu'entró a valir en 2016.

Causes de la inseguridá alimentaria

Anguaño, el mundu puede producir abondos alimentos pa nutrir afechiscamente a tolos sos habitantes. El problema ye l'accesu a la producción y la distribución de los alimentos a nivel mundial. Les causes de la inseguridá alimentaria respuenden, ente otres, a les polítiques nacionales ya internacionales qu'afecten al desenvolvimientu agrícola o al comerciu, y a les fluctuaciones nos precios de los alimentos producíes por desastres naturales o conflictos armaos.

Organismos como la FAO consideren que, si les muyeres llabradores tuvieren el mesmu accesu que los homes a la propiedá de la tierra y los alimentos, el númberu de persones con fame nel mundu podría amenorgase hasta en 150 millones. En Global Humanitaria desenvuélvense proyectos p'ameyorar la nutrición de más de 50.000 neños y neñes n'edá escolar, les sos families y les sos comunidaes. Estos proyectos van dende güertos y comedores escolares, vixilancia alimentaria y nutricional de población escolarizada, y diagnósticos nutricionales, hasta la formación comuñal en seguridá alimentaria y nutricional, incluyendo bones práctiques pa la manipulación ya hixene de los alimentos.