Catorce persones empezaron esti 2 d'ochobre, en Candás, el cursu d'Agricultura Ecolóxica qu'imparte la Rede Asturiana de Desenvolvimientu Rural (READER) con cargu al proyectu READER Crea nel marcu del Programa Emplea Verde de la Fundación Biodiversidá adscrita al Ministeriu de Transición Ecolóxica. A la presentación del cursu, amás de la coordinadora técnica del proyectu, María José Fernández Carrocera, asistió la conceyala Cecilia Tascón Fernández.

La conceyala valoró esta iniciativa empobinada a promover l'empléu y dinamizar la economía del mediu rural asturianu. Tascón Fernández reivindicó l'agricultura ecolóxica como “una alternativa non yá pa agricultores, sinón tamién pa persones en situación de desempléu con interés n'afincase nes contornes rurales y/o entamar na zona rural. Hai recordar qu'estos talleres formativos van empobinaos puramente a persones qu'anguaño s'atopen en paru”.

L'oxetivu d'esti taller, de 180 hores ya impartíu pol técnicu Javier Flórez, ye que l'alumnáu pueda realizar operaciones de manexu, caltenimientu, producción y recueya de cultivos nuna esplotación agrícola ecolóxica, aplicando criterios de calidá, sostenibilidá, rentabilidá, cumpliendo cola lexislación d'agricultura ecolóxica, control de calidá y prevención de riesgos llaborales vixentes.

Con cargu al proyectu READER Crea, impartiéronse un total d'ocho cursos, de los que cinco yá remataron. El so oxetivu ye ameyorar la empleabilidá y la cualificación de persones desemplegaes que pretenden desenvolver una actividá n'árees protexíes (Rede Natura 2000 y Reserves de la Biosfera) y nel mundu rural polo xeneral, al traviés de cursos de formación afechos al llogru de los Certificaos de Profesionalidá y d'acciones d'innovación social que favorezan la contratación efectiva, per parte d'empreses locales, del mayor númberu d'alumnáu posible.