Prosiguió la XIII Ronda Teatral de
Carreño esti pasáu sábadu 27 de xineru, na so segunda función nes
Escueles de Carrió con ésitu y llenu total de públicu.
Tarde-nueche de rises nel barriu d'El Bandín y aplausos cola
actuación de “Les Ayalgues” de Carreño y el Grupu de Teatru
“Rosario Trabanco” de Xixón.
“Dende'l Consistoriu una vegada
más, nun vamos cansar de repitir l'agradecimientu a les asociaciones
vecinales del conceyu y a les persones de les parroquies que nos
brinden el so sofitu y inestimable collaboración con cuantes
actividaes municipales impúlsense. Ensin la vecindá actividaes como
la desenvuelta en Carrió sería bien difícil la so celebración”
declaró Cecilia Tascón-Concejala de Cultura-.
El grupu de teatru “Rosario Trabanco”
de Xixón foi fundáu por Elisa Alvarez y Lisardo Suárez
nel añu 2.000. Siendo Lisardo el so director. Dambos
lleven dende la so mocedá venceyaos al teatru costumista, onde se
conocieron. El grupu fórmenlo alredor d'una docena de persones,
incluyida la so nieta Sara. El so principal oxetivu yera y ye
contribuyir al espardimientu y caltenimientu de la cultura asturiana,
al traviés del teatru. Non yá realizaron representaciones teatrales
n'Asturies sinón tamién en Galicia, Madrid, Llión, Castellón,
Alicante, Valladolid,...
Nes sos vitrines cunten con trés
premios aurora del Salón de Teatru Costumista de Candás.Nel 2015
Elisa Alvarez ye galardonada col premiu Aurora a la meyor actriz
secundaria. Faciendo lo propio Lisardo Suárez nel 2016 nel
apartáu de meyor actor secundariu y el grupu al meyor vestuariu y
maquillaxe.
“Rosario Trabanco” allantó al
públicu asistente cola obra “La Magdalena y San Roque” una
selección d'obres asturianes en pequeñu formatu de dellos autores
asturianos.
Pela so parte “Les Ayalgues” de
Carreño representaron “La Bruxa” y “La comunidad”, dos
de los sos sketch risibles más esitosos. “Les Ayalgues” son un
grupu de muyeres qu'en participando nun taller de iniciación al
teatru dientro del programa rexonal “Tiempu Propiu”, afayaron el
so interés nes artes escéniques y solicitaron a la conceyalía
d'Igualdá impulsar una actividá teatral pa elles nel Conceyu.
Asina empezaron un taller de teatru cola profesional asturiana Gema
de Luis. D'ende surdió la creación del so grupu de teatru.
La próxima tarde de teatru va tener
llugar na parroquia d'El Pieloro, el sábadu 3 marzu,
coincidiendo cola festividá de San Blas nel Centru d'Iniciativa
Rural a les 19 hores cola actuación del Grupu de Teatru
“Padre Coll” de la Felguera con 2Sainetes Asturianos” y los
monólogos de Ludivino Díaz González “Pin de la Cotolla”.
Albandi
