La esposición monográfica “Carreño
y Les sos Xentes” llega a la parroquia d'Albandi. Esti sábadu,
21 d'abril, el Centru d'Iniciativa Rural va acoyer l'amuesa
fotográfica dedicada a esta parroquia.
L'Asociación Cultural “Candás
Marinero” en collaboración col Conceyu de Carreño, foi
arrexuntando instantánees, de los vecinos y les vecines, poles
parroquies del Conceyu, llevando a cabu un trabayosu procesu de
digitalización y arquivu de les fotografíes antigües vencíes
desinteresadamente pol vecinderu.
“Gracies a la collaboración del
vecinderu pudiéronse recuperar unes trescientes instantánees, de
les que sesenta van poder esfrutase na amuesa. Al traviés d'elles,
vamos poder comprobar los cambeos producíos a lo llargo del sieglu
XX na zona rural. Vamos Ver los cambeos esperimentaos nos oficios
tradicionales, la indumentaria, la forma d'ocupar el so tiempu d'ociu
o les celebraciones familiares, por casu” señaló Cecilia
Tascón -Concejala de Cultura.
La esposición de Albandi consta de 60
fotografíes impreses en cartón pluma, distribuyíes en 15 paneles
nes que se repasa la hestoria de Albandi, de les sos xentes nel
sieglu XX.
“Les families de la parroquia que
collaboraron cola aportación de fotografíes fueron trelce, sumando
un total de 267 imaxes arrexuntaes. De toes elles y como vien siendo
costume escoyimos 60, atendiendo a una serie de criterios como ye que
toles families qu'apurrieren material atópense representaes;
escoyendo les que dispongan d'una meyor resolvimientu y sían más
representatives de la parroquia; y les más antigües y que nelles
apaezan más d'una persona” comentó Tito Aramendi-Presidente
de “Candás Marinero”
“Atendiendo a estos criterios la
fotografía más antigua que se va esponer na amuesa ye de la Familia
de José Antonio Pérez Lazcano, que inmortalizó una instantánea de
la Primer Comunión nel añu 1947, na qu'apaecen el párrocu D.
Rosendo Mazuelas, y los molacinos Alvarín de Segis y José Antonio
Molín, finaos bien mozos” prosiguió Aramendi.
Tres la inauguración, que va tener
llugar el sábadu 21 a les 19 hores, el grupu de teatru “Carbayín”
va representar, dientro de la XIII Ronda de Teatru per Carreño, la
obra de teatru costumista “Yo, tu y el vecín” y José Antonio
González “Cantu la vara” va allantanos cola so voz y el Cantar
Asturianu.
La esposición podrá visitase dende'l
mesmu día de la inauguración, 21 d'abril hasta'l 2 de mayu, nel
siguiente horariu, de martes a domingu de 18 a 21 hores.
“Carreño y Les sos Xentes, ye más
qu'una esposición de semeyes antigües, ye la hestoria del nuesu
Conceyu a lo llargo del últimu sieglu. Son 12 esposiciones, una por
caúna de les parroquies que van tener el so llazu d'unión na amuesa
final na Antigua Fábrica d'Ortiz en Candás onde van tar presentes
les 12 esposiciones, les 12 parroquies”- concluyó Tascón.