El control de la calidá del aire
en Carreño refuérzase cola incorporación d'una nueva
unidá móvil. Eso va dexar, per primer vegada, publicar información
municipal sobre la contaminación atmosférica.
El conceyu va cuntar con un mididor
portátil que rotará poles parroquies de Carreño que nun cunten con
un dispositivu fixu. La so misión va ser comprobar que tamién
cumplen colos planes de calidá del aire, amplíense los controles
p'analizar la calidá atmosférica.
“Cuntando con esta estación móvil
vamos tener más flexibilidá, porque vamos poder collaborar cola
alministración rexonal que tien les competencies nesta materia,
faciendo una llabor complementaria con campañes de midida nes zones
del conceyu qu'escarecen d'estación fixa y responder a posibles
situaciones escepcionales” - señaló Roberto Bueno, Edil de
Mediuambiente de Carreño.
Mañana, martes, día 2 d'ochobre,
a partir de les 11 h, va instalasena urbanización de Xivares la esta
estación de midida móvi. Onde va permanecer mientres un periodu de
seis meses, darréu va pasar a la parroquia de Prevera y de siguío a
Llorgozana, pa tomar datos na área de La Barrera, La Granda y
Tabaza. Los primeros allugamientos d'esta nueva estación
analizáronse y alcordaron nel senu de la última comisión
informativa de mediuambiente, celebrada'l xueves pasáu.
“Hasta la fecha, les estaciones
automátiques del control de la calidá del aire nel nuesu conceyu
pertenecíen a la rede de les empreses. Tenemos seis instalaes. Una
perteneciente a Arcelor-Mittal denominada Acería LD-III en Tabaza
que dispon d'analizadores pa los contaminantes PM10, NO, NO2 y
SO2. Dos estaciones pertenecientes a Tudela Veguin,
Fábrica d'Aboño, denominaes y alcontraes en Monte Morís (Albandi)
y Falmuria (Priendes) respectivamente, disponen d'analizadores pa los
contaminantes PM10, NO; NO2 y SO2. Y trés estaciones
pertenecientes a EDP Hidrocantábrico, Térmica d'Aboño denominaes y
allugaes en Candás (Candás), Xanes (El Valle) y Tranqueru (Albandi)
respectivamente. Disponen, nesti casu d'analizadores pa los
contaminantes PM10 y SO2. El Tranqueru dispon tamién d'analizador
PM2.5. A elles sumase esta nueva séptima, móvil y de titularidá
municipal” – esclarió Bueno.
La nueva estación de midida móvil va
cuntar con analizadores de contaminantes atmosféricos de PM10 y
PM2,5 y de SO2 (dióxidu d'azufre) combináu con H2S ( ácidu
sulfíhídrico).
El suministru de la estación móvil,
realízase nel marcu del alcuerdu políticu alcanzáu entre SOMOS
Carreño y el gobiernu socialista nel marcu de les inversiones
sostenibles encetaes col postreru remanente, aprobáu Tres la
llicitación correspondiente, axudicóse dichu suministru a finales
d'Avientu del añu pasáu (concretamente'l 29.12.2017) a la empresa
ENVIRA SOSTENIBLES, S.A por importe 94.595,05 € + 19.864,96 €
de IVA con una garantía total de 24 meses.
A partir de la firma del contratu,
según el pliegu técnicu aprobáu, nun plazu de dos meses, la
empresa suministró tolos equipos que formen la estación móvil,
emitiéndose un acta de recepción al respective. A partir d'esa
fecha, nel plazu previstu, dieron en la verificación y axuste de
tolos equipos, con cuenta de comprobar el so funcionamientu na forma
y condiciones previstes, constatando que tol sistema instaláu
funciona correctamente. Esti 2 d'ochobre, va faese la recepción de
la Estación Móvil, y van apurrinos al Conceyu toa la documentación
precisa que va constar de lo siguiente:
- Descripción y funcionamientu de los
equipos.
- Diagrama y planos constructivos y de
disposición de los elementos.
- Certificaos de calibración y pruebes
de los equipos de midida.
- Manual del usuariu de los equipos y
del sistema d'alquisición y tresmisión de datos.
“L'oxetivu d'esta inversión
municipal ye ameyorar los controles al tener más información sobre
la calidá del aire nel conceyu. Pretendemos non yá aumentar la
cantidá de estaciones que controlen el nuesu conceyu y la calidá na
recoyida de datos, sinón tamién el so usu posterior, yá sía pal
so espardimientu ente la ciudadanía y l'información en tiempu real,
sinón tamién pa la realización d'estudios y analises que procedan
impulsaos dende la área de medioambiente municipal” –
añedió'l Conceyal
“Los datos que sobre la calidá
del aire en Carreño refundie la estación móvil de midida van poder
consultase na web del Principáu
https://@www.asturias.es/portal/site/medioambiente
y na web municipal onde vamos abrir una sección na que vamos
ufiertar los datos” – concluyó'l Conceyal.
Albandi
