L'Asociación Vecinal “Llorgozana
Esiste” celebró esti domingu, 18 de noviembre, la tradicional
xornada d'Hermandá añal a la que convocaron a la vecindá de la
parroquia carreñense más estensa. Anguaño conmemoren la XIII
edición.
A lo llargo del alcuentru vecinal
l'asociación homenaxó a dos de los sos mayores, Araceli García
Martínez “ Araceli la de Bruno” y José Cuervo García “Pepe'l Rei”.
Araceli García Martínez, ye natural
de la parroquia d'El Valle de Carreño. Fía de Josefa y Ángel de
Bruno. En Llorgozana xuntu col so home, yá fináu construyeron la so
familia. Ellí mora anguaño nel barriu de Sebades cola so nuera
Julia. Tien 85 años recién cumplíos ( 9.11.1933), y la so vida
siempres tuvo amestada al campu. Foi homenaxada en 2008 pol
consistoriu carreñense nel marcu de los actos d'el 8 de Marzu
destacándose con un colectivu de muyeres rurales. Aficionada a
texer, dedica munches hores faer llabores coles que gasaya y
sospriende a la so estensa familia. Los sos nietos Pablo, Óscar y
Amaya, según los sos bisnietos son el motor del so día ente día.
Va Allegar al homenaxe acompañada de la so redolada familiar más
próxima. Especial ilusión fai-y qu'asistan bona parte de los sos
hermanos de Casa Bruno.
José Cuervo García va cumplir 85 años
el día 28 de este mesmu mes. Ye vecín del barriu d'El Monte, y el
varón de más edá homenaxáu nesta edición. Tamién la so vida
profesional desenvolvióse íntegramente nel ámbitu del mediu rural.
La celebración vecinal empezó a les
12:00 h. cola celebración d'una misa na Ilesia de Santa María La
Real de Llorgozana n'honor de toles persones difuntes pertenecientes
a l'Asociación. Tres la celebración de la mesma'l vecinderu
treslladóse al restorán “La Martona” nel barriu candasín d'El
Regueral, onde esfrutaron de les viandes y unes hores de baille, amás
d'unos momentos de confraternización vecinal.
En representación del Conceyu
Carreñense allegaron a la xornada los conceyales Cecilia Tascón y
el Conceyal del Mediu Rural, Manuel Noceda.
Anguaño l'asociación organizadora
“LogrezanaExiste” atópase somorguiada nun períodu de renovación
de la so Xunta Directiva tres l'arrenunciu efectuáu pol so anterior
Presidente, Roberto Bonu, al incorporase ésti como Conceyal del
Conceyu de Carreño. Polo qu'este foi'l primer actu oficial nel que
la nueva Presidenta en Funciones, María del Carmen García Fernández
actúa como tal.
La nueva Xunta Directiva va ser
escoyida'l próximu 10 d'avientu na Asamblea Xeneral, convocada con
esi envís, ente les candidatures presentaes ente'l 10 de noviembre
hasta'l día de l'Asamblea
Albandi
